रायपुर, 29 अगस्त 2020। विधानसभा अध्यक्ष डॉ. चरणदास महंत ह छत्तीसगढ़ विधानसभा के नवा भवन के शिलान्यास अवसर म मुख्यमंत्री श्री भूपेश बघेल ल बधाई देवत कहिन के उंखर परिकल्पना के मुताबिक सर्वसुविधायुक्त आधुनिक तकनीक ले लैस भव्य भवन के आधारशिला रखे गए हे। ये भवन भर नो हे, ये ह लोकतंत्र के मंदिर ये। ये मौका म हम सबो विधायकगण संकल्प लेवत हन के हम भारत के लोकतांत्रिक व्यवस्था ल सुदृढ़ करे बर अगुवाई करबोन। ये मौका म उमन छत्तीसगढ़ के निर्माण म भागीदारी देवइया पुरखा मन ल नमन करिन अऊ उम्मीद जताईन के पुरखा मन के आशीर्वाद ले हम सब छत्तीसगढ़ महतारी के सेवा म जुटे रइबो।
डा. महंत ह ये मौका म मुख्यमंत्री श्री भूपेश बघेल अऊ उंखर सरकार के उल्लेख करत कहिन के आप मन सबो ल छत्तीसगढ़ महतारी के सेवा के मौका मिले हे। उमन गरीब, किसान, मजदूर, आदिवासी अउ वंचित मन के बेहतरी बर सरकार कोति ले करे जात काम के सराहना करिन अऊ कहिन के जनकल्याण के काम मन बर सबो के सहयोग मिलत हे। विधानसभा अध्यक्ष ह कहिन के छत्तीसगढ़ बाबा गुरुघासी दास, संत कबीर के धरती ये। छत्तीसगढ़ सही म प्रेम के धरती ये। हम सब प्रेम अऊ सद्भाव के उदाहरण बनन। विधानसभा अध्यक्ष ह कहिन के कोरोना संकटकाल म मास्क लगावव फेर वाणी के मिठास बनाए रखव। सोशल डिस्टेंसिंग रखव, फेर दिल के बीच दूरी झन आन देवव। नेता प्रतिपक्ष श्री धरमलाल कौशिक ह विधानसभा भवन के शिलान्यास बर मुख्यमंत्री, विधानसभा अध्यक्ष संग सबो मनखे मन ल बधाई अऊ शुभकामना दीन। उमन उम्मीद जताईन के विधायक मन बर घलोक अवइया बेरा म घर के व्यवस्था होही।
