बिलासपुर, वन मंत्री श्री केदार कश्यप के हुकुम के मुताबिक छत्तीसगढ़ राज्य वन विकास निगम लिमिटेड से अवैध कटाई, अतिक्रमण अऊ अवैध उत्खनन म नियंत्रण खातिर सरलग कार्रवाई करे जात हे। प्रबंध संचालक के निर्देश म सबो परियोजना मंडल म नियमित दिन अऊ रात्रि गश्त करे जात हे, जेखर सकारात्मक प्रभाव वन सुरक्षा म दिखत हे।
अवैध रूप ले रेत उत्खनन करत 5 ट्रैक्टर-ट्रॉली ल मौका म करे गीस जब्त
कोटा परियोजना मंडल, बिलासपुर के टीम ह गश्ती के समय अरपा नदी ले अवैध रूप ले रेत उत्खनन करत 5 ट्रैक्टर-ट्रॉली ल मौका म पकडि़स। ये कार्रवाई कलमीटार बीट के कक्ष नंबर पी-1586 म करे गीस। सबो ट्रैक्टर ट्रॉली मन म रेत भरे रहिस, जेमां लगभग 11 घन मीटर अवैध रेत जब्त करे गीस। पकड़े गे सबो ट्रैक्टर वाहन स्वामी मन के विरुद्ध भारतीय वन अधिनियम 1927 के धारा 33 (1ख) के तहत वन अपराध दर्ज करे गए हे। प्रकरण नंबर 87/18 बनाके वाहन मन ल राजसात करे बर अधिकृत अधिकारी के आगू प्रस्तुत करे के प्रक्रिया करे जात हे।
वाहन मालिक पहिचान छिपाए खातिर नंबर प्लेट हटा देत रहिस
जांच म ये घलोक आगू आइस के अवैध उत्खनन के मामला म कई पइत वाहन मालिक पहिचान छिपाए खातिर नंबर प्लेट हटा देथें, फेर चेसिस नंबर के आधार म परिवहन विभाग ले वाहन मालिक के जानकारी प्राप्त करे जाथे। ये अभियान क्षेत्रीय महाप्रबंधक बिलासपुर श्री अभिषेक सिंह अऊ मंडल प्रबंधक कोटा परियोजना मंडल श्री सत्यदेव शर्मा के मार्गदर्शन म परियोजना परिक्षेत्र अधिकारी श्री वैभव साहू के अगुवई म सफलतापूर्वक संचालित करे गीस। अभियान म वन विभाग के आन अधिकारी अऊ कर्मचारी घलोक सामिल रहिन।
सतर्कता के संग प्रभावी कार्रवाई जारी रखे के निर्देश
वन अपराध म जल्दी अऊ सख्त कार्रवाई खातिर प्रबंध संचालक श्री प्रेमकुमार ह पूरा टीम ल बधाई देहे हे। संगेच उमन प्रदेश के सबो निगम अधिकारी मन अऊ कर्मचारी मन ल वन क्षेत्र मन म अइसनहे सतर्कता के संग प्रभावी कार्रवाई जारी रखे के निर्देश देहे हें। अवइया साल के गोपनीय प्रतिवेदन म वन सुरक्षा अऊ संवर्धन म संबंधित अधिकारी मन अऊ कर्मचारी मन के भूमिका के उल्लेख करे जाही।