रायपुर 03 जुलाई 2024। मुख्यमंत्री श्री विष्णुदेव साय के निर्देश के बाद रायपुर जिला म शासकीय जमीन मन म अवैध कब्जा करके अवैध निर्माण करे अऊ उंखर अवैध तरीका ले खरीदी-बिक्री उपर कार्रवाई तेज हो गए हे। कलेक्टर डॉ. गौरव सिंह के अगुवई म राजस्व अमला ह अइसन प्रकरण मन म बिना देरी करे कार्रवाई शुरू कर देहे हे। आज रायपुर नगर निगम क्षेत्र के सेजबहार म अइसनहेच एक बड़का कार्रवाई करे गीस। राजस्व अमला ह सेजबहार म मुख्य सड़क के तीर लगे लगभग पांच एकड़ सरकारी जमीन ल अवैध निर्माण अऊ कब्जा ले मुक्त कराए हे। ए जमीन म माना के बनरसी गांव निवासी संतोष डहरिया ह अवैध कब्जा करके अवैध रूप ले पक्का निर्माण करे रहिस अऊ वोकर बारे म जमीन के अवैध खरीदी-बिक्री करे के शिकायत स्थानीय मनखे मन ह मुख्यमंत्री जनदर्शन कार्यक्रम म करे रहिन। सरकारी जमीन म अवैध कब्जा के शिकायत ल श्री साय ह गंभीरता ले लीन अऊ ए जांच करके जल्दी कार्रवाई करे के निर्देश कलेक्टर रायपुर ल देहे रहिन।
कलेक्टर डॉ. गौरव सिंह ह प्रकरण के जांच के जिम्मा रायपुर एसडीएम अऊ वोखर अमला ल सौंपे रहिन। राजस्व अमला कोति ले करे गए जांच के बाद सेजबहार म मुख्य सड़क ले लगे लगभग पांच एकड़ सरकारी जमीन म अवैध कब्जा होना पाए गीस। ए जमीन म अवैध कब्जाधारी ह पक्का निर्माण जइसे दुकान आदि घलोक बना लेहे रहिस। राजस्व अमला ल जमीन के अवैध रूप ले दूसर मनखे मन ल बेचे के घलोक शिकायत मिले रहिस। सड़क के किनारे होए के सेमी खेती-किसानी के ए मौसम म जमीन के पीछू के खेत मन तक किसान मन ल जाय म घलोक परेशानी अऊ लड़ई-झगड़ा के सामना करना परत रहिस।
आज एसडीएम श्री नंदकुमार चौबे, तहसीलदार श्री पवन कोसमा अऊ अकतहा तहसीलदार श्रीमती तुलसी राठौर ह राजस्व अमला के संग पुलिस के मौजूदगी म जेसीबी मशीन से ए जमीन म अवैध रूप ले बनाये गए पक्का दुकाननुमा निर्माण ल तोड़ दीस। एखर संगेच लगभग पांच-छै मनखे मन के कुछ जमीन के कुछ हिस्सा म पोल लगाके करे गए तार फेसिंग ल घलोक हटा दे गए हे। अब ए जमीन ले बेजाकब्जा हट जाय ले किसान मन ल घलोक अपन खेत तक जाय बर आसानी ले रद्दा मिल जाही अऊ सरकारी जमीन के सुरक्षा घलोक हो जाही। किसान चालू मानसून मौसम म खेत मन म फसल के बोआई आसानी ले कर पाहीं। एखर संगेच ओ मन ल अपन कास्तकारी जमीन म आए-जाए बर झगड़-लड़ाई मारपीट ले घलोक मुक्ति मिल जाही। प्रशासन के ए कार्रवाई बर सेजबहार गांव के निवासी श्री शारदा राम साहू, श्री कामता प्रसाद साहू, श्री ललित साहू, श्री खेलन साहू, श्री दीनदयाल रात्रे, श्री दल्लू यादव श्री संतोष बघेल आदि ह मुख्यमंत्री श्री साय अऊ जिला प्रशासन के आभार जताए हे। सबो गांव वासी मन ह सरकारी जमीन म अवैध कब्जा करइया के विरूद्ध घलोक कड़ा कार्रवाई के मांग करे हें।
