मुख्यमंत्री श्री भूपेश बघेल ह सरकारी अस्पताल मन म जेनेरिक दवई के बल्‍दा ब्रांडेड दवई लिखे म बगियाईस

रायपुर, मुख्यमंत्री श्री भूपेश बघेल ह आज अपन निवास कार्यालय म नगरीय प्रशासन अउ विकास विभाग अऊ पर्यावरण अउ गृह विभाग के समीक्षा बैठक लीन। मुख्यमंत्री ह बैठक म श्री धन्वंतरी जेनेरिक मेडिकल स्टोर योजना के समीक्षा के बेरा म सरकारी अस्पताल मन म जेनेरिक दवई के बल्‍दा ब्रांडेड दवई लिखे के बात उपर बगियाईस। उमन कहिन कि जेन सरकारी डॉक्टर ब्रांडेड दवईयां लिखथे वोकर उपर कड़क कार्रवाई करे जाय। मुख्यमंत्री के हुकुम के बाद प्रमुख सचिव स्वास्थ्य ह तुरंत सबो कलेक्टर अऊ सीएमएचओ मन ल हुकुम जारी करत कहिन कि ये ठउका करव के डॉक्टर सिरिफ जेनेरिक दवई ही लिखयं। मुख्यमंत्री ल ये जानकारी मिले रहिस कि घेरी-बेरी चेताए के बाद घलो डॉक्टर जेनेरिक के बल्‍दा ब्रांडेड दवई लिखत हें।
जानबा हे कि मनखे मन ल सस्ता दवई मिलय, एखर बर छत्तीसगढ़ सरकार ह श्री धन्वंतरी जेनेरिक मेडिकल स्टोर शुरू करे हे। बैठक म बताए गीस कि प्रदेश म ये योजना के तहत 159 मेडिकल स्टोर संचालित हे। ए मेडिकल स्टोर्स के माध्यम ले अब तक विक्रय करे गए दवई मन ले करीबन 17 लाख 92 हजार नागरिक मन के 17 करोड़ 38 लाख रूपिया के बचत होए हे। बैठक म बताए गीस कि प्रदेश के 9 नगर निगम म 500 वर्ग मीटर तक के आवासीय प्लॉटस म निर्माण बर ऑनलाईन भवन अनुज्ञा प्रणाली लागू करे गए हे, जेखर से अब तक 3771 भवन अनुज्ञा जारी करे गए हे। बैठक म मुख्यमंत्री ह लोक सेवा गारंटी अधिनियम के तहत नगरीय निकाय ले नागरिक मन ल मिलईया सेवा मन ल जादा ले जादा ऑनलाईन करे के हुकुम देहे हें।
बैठक म नगरीय प्रशासन अउ विकास मंत्री डॉ. शिवकुमार डहरिया, मुख्य सचिव श्री अमिताभ जैन, अपर मुख्य सचिव श्री सुब्रत साहू, मुख्यमंत्री के सचिव श्री सिद्धार्थ कोमल सिंह परदेशी, नगरीय प्रशासन अउ विकास विभाग के सचिव श्रीमती अलरमेलमंगई डी., आयुक्त, छत्तीसगढ़ गृह निर्माण मंडल डॉ अयाज भाई तम्बोली, टाउन एन्ड कंट्री प्लानिंग के संचालक श्री जय प्रकाश मौर्य, सूडा के मुख्य कार्यपालन अधिकारी श्री सौमिल रंजन चौबे संग विभाग मन के वरिष्ठ अधिकारी उपस्थित रहिन।