पहली कैबिनेट बैठक म ही होए रहिस 18 लाख घर बनाए के निर्णय
कानून-व्यवस्था अऊ राजस्व मामला म दीन सख्त निर्देश
जुआ, सट्टा, अवैध शराब अऊ अपराध म नियंत्रण बर कड़ी कार्रवाई करे ल कहिन
प्रदेश म होवय कानून के राज: मुख्यमंत्री श्री विष्णु देव साय
मुख्यमंत्री ह प्रदेश म कोरोना के अभी हाल स्थिति के समीक्षा घलोक करिन
रायपुर. 22 दिसम्बर 2023। मुख्यमंत्री श्री विष्णु देव साय आज वीडियो कॉन्फ्रेंसिंग के माध्यम ले प्रदेश के सबो कलेक्टर मन ले पहली पइत मुखातिब होइन। उमन सबो कलेक्टर मन ल प्रधानमंत्री आवास योजना के हितग्राही मन के सूची जल्दी तियार करे के निर्देश दीन ताकि जल्दी निर्माण कार्य करे जा सकय। उमन प्रदेश म कानून-व्यवस्था बनाए रखे के संबंध म सख्त निर्देश दीन। उमन कहिन कि प्रदेश म कानून के राज दिखना चाही। मुख्यमंत्री ह जुआ, सट्टा, अवैध शराब अऊ अपराध म नियंत्रण बर कड़क कार्रवाई करे ल कहिन। श्री साय ह राजस्व संबंधी मामलाामन के निराकरण घलोक तेजी ले करे के निर्देश दीन। उमन कहिन कि फौती, जाति प्रमाण पत्र, सीमांकन अऊ नक्शा दुरूस्तीकरण जइसे काम मन ल लेके जनता ले कोनो प्रकार के शिकायत नइ आना चाही। बिना कोनो लेन-देन के मनखे मन के काम लउहे होना चाही। उमन शहरी क्षेत्र मन म नाली अऊ गली मन के साफ-सफाई म विशेष जोर देहे ल कहिन। उप मुख्यमंत्री श्री अरूण साव अऊ श्री विजय शर्मा अऊ मुख्य सचिव श्री अमिताभ जैन घलोक वीडियो कॉन्फ्रेसिंग म सामिल होइन।
मुख्यमंत्री श्री साय ह कहिन कि राज्य म नवा सरकार के गठन होतेच 18 लाख मनखे मन ल प्रधानमंत्री आवास देहे अऊ 12 लाख किसान मन ल दू साल के बकाया बोनस के राशि देहे के बड़का फैसला लेहे गए हे। उमन आवास बर पात्र सबो मनखे मन के सूची तुरंत तियार करे के निर्देश कलेक्टर मन ल दीन। श्री साय ह अवइया 25 दिसम्बर के प्रदेश म मनाए जाय वाले सुशासन दिवस के तैयारी के संबंध म घलोक जरूरी निर्देश दीन।
मुख्यमंत्री ह स्वास्थ्य विभाग के वरिष्ठ अधिकारी मन अऊ सबो कलेक्टर मन के संग प्रदेश म कोरोना के अभी हाल स्थिति के समीक्षा घलोक करिन। उमन देश म कोरोना के बढ़त मामला ल देखत एखर से बचाव अऊ रोकथाम बर भारत सरकार कोति ले जारी दिशा-निर्देश के कड़ाई ले पालन करे के निर्देश दीन। उमन कोरोना के संभावित लक्षण वाले मनखे मन के सैम्पल के जांच रोजेच ज्यादा-ज्यादा संख्या म करे ल कहिन। उमन कोरोना के इलाज बर जरूरी व्यवस्था के जांच बर अस्पताल मन म मॉक-ड्रिल घलोक करे ल कहिन।
उप मुख्यमंत्री श्री अरूण साव ह वीडियो कॉन्फ्रेसिंग म सबो कलेक्टर मन ले कहिन कि मुख्यमंत्री के निर्देश के अक्षरशः पालन सुनिश्चित करे जाए। प्रदेश म कानून-व्यवस्था के स्थिति अच्छा होना चाही। प्रदेशवासी मन ल कोनो प्रकार के तकलीफ झन होवय। शासन के हर योजना मनखे मन तक बने सहिन पहुंचय। उमन कहिन कि सबो अधिकारी अपन योग्यता अऊ क्षमता के उपयोग जनता के हित म करव। विधानसभा चुनाव बर आचार संहिता प्रभावी होए के बाद ले रूके काम मन म विशेष ध्यान देवव। मनखे मन के जरूरत ल ध्यान म रखके आप मन नवा ऊर्जा अऊ उत्साह ले काम करहू, अइसन अपेक्षा मैं करथंव।
उप मुख्यमंत्री श्री विजय शर्मा ह वीसी म कहिन कि सरकार गठन के शुरूआती आठ दिन म ही राज्य म कई बड़का फैसला लेहे गए हे। शासन अऊ प्रशासन ल मिलके ए फैसलाामन के लाभ मनखे मन तक बेहतर तरीका ले पहुंचाना हे। उमन कहिन कि 25 दिसम्बर के सुशासन दिवस के बाद 26 दिसम्बर के वीर बाल दिवस मनाया जाना हे। वीर बाल दिवस के माध्यम ले लइका मन म वीरता के भाव जागही। उमन कलेक्टर मन ल एखर तैयारी के निर्देश दीन। स्वास्थ्य विभाग के अपर मुख्य सचिव श्रीमती रेणु जी. पिल्लै, सचिव श्री सिद्धार्थ कोमल परदेशी, मुख्यमंत्री के सचिव श्री पी. दयानंद, स्वास्थ्य विभाग के आयुक्त डॉ. से.आर. प्रसन्ना, नगरीय प्रशासन अउर विकास विभाग के विशेष सचिव श्री अय्याज फकीर तम्बोली, स्वास्थ्य सेवाओं के संचालक श्री जयप्रकाश मौर्य, राष्ट्रीय स्वास्थ्य मिशन के संचालक श्री भोस्कर विलास संदिपान, सीजीएमएससी के प्रबंध संचालक श्री चंद्रकांत वर्मा अऊ आईडीएसपी के नोडल अधिकारी डॉ. धर्मेद्र गहवई घलोक वीडियो कॉन्फ्रेसिंग म उपस्थित रहिन।
