आन राज्य मन ले धान के अवैध परिवहन उपर कड़ाई ले लगावव रोक: मुख्यमंत्री श्री भूपेश बघेल

रायपुर, मुख्यमंत्री श्री भूपेश बघेल ह प्रदेश के सीमावर्ती राज्य मन ले छत्तीसगढ़ म धान के अवैध परिवहन के शिकायत ल गंभीरता ले लेवत हें। उमन सबो जिला कलेक्टर अऊ पुलिस अधीक्षक मन ल परोसी राज्य मन ले धान के अवैध परिवहन उपर कड़ाई से रोक लगाय के हुकुम देहे हें। मुख्यमंत्री ह अधिकारी मन ले कहे हें कि पड़ोसी राज्य ले लगे सीमा मन ल सील करे जाय अऊ सीमावर्ती इलाका मन म धान के अवैध परिवहन रोके बर लगातार कड़क निगरानी करे जाय अऊ धान के अवैध परिवहन करइया मन उपर कठोरता ले कार्रवाई करे जाय। मुख्यमंत्री ह अधिकारी मन ल एहू ठउका करे के निर्देश देहे हें कि प्रदेश के कोनो किसान मन ल धान के परिवहन के समय कोनो प्रकार के परेशानी के सामना झन करना परय।
मुख्यमंत्री ह कहे हें कि प्रदेश म किसान मन के समर्थन मूल्य म धान के खरीदी 01 दिसम्बर ले चालू होवत हे। छत्तीसगढ़ म किसान मन ल सीमावर्ती राज्य मन के तुलना म धान के जादा कीमत मिलत हे। किसान मन ल धान के समर्थन मूल्य मिले के संगे-संग राज्य सरकार कोति ले राजीव गांधी किसान न्याय योजना के तहत इनपुट सब्सिडी घलोक देहे जात हे। ते पाए के धान खरीदी के सीजन म हर साल सीमावर्ती राज्य मन ले धान के अवैध परिवहन के शिकायत मिलथे, जेकर उपर कड़ाई से अंकुश लगाय के जरूरत हे, जेखर ले छत्तीसगढ़ के किसान मन ल ये योजना के जादा ले जादा लाभ मिल सकय।
छत्तीसगढ़ म ये साल किसान मन ले समर्थन मूल्य म करीबन 105 लाख मेट्रिक टन धान के खरीदी के अनुमान हे। प्रदेश मं करीबन 2311 ले जादा सहकारी समिति केन्द्र मन के माध्यम ले समर्थन मूल्य म धान के खरीदी करे जाही। ये साल 1.13 लाख नवा किसान मन ह पंजीयन कराए हें। अभी तक धान विक्रय बर पंजीकृत किसान मन के संख्या 22 लाख 66 हजार ले जादा हो गए हे।