- छत्तीसगढ़ के नवनिर्माण म विद्यार्थी मन अपन भागीदारी निभावव: श्री बघेल
- छत्तीसगढ़ ह साहित्य, रंगमंच अऊ लोककला के क्षेत्र म देश ल दीस बहुत अकन विभूति: श्री वाजपेयी
- देश अउ समाज के विकास म उच्च शिक्षा के महत्वपूर्ण स्थान: श्री पटेल
- पंडित रविशंकर शुक्ल विश्वविद्यालय के 25वां दीक्षांत समारोह
रायपुर, 26 फरवरी 2020। राज्यपाल सुश्री अनुसुईया उइके ह कहिन कि सही मतलब म दीक्षांत वो हे जब विद्यार्थी अब तक पाए ज्ञान के आधार म अपन जीवन के उद्देश्य मन ल पाथे अऊ अपन सकेले ज्ञान ल अकार रूप देवत जीवन के कठिन रद्दा म आगू बढ़थे। जऊन पढ़ईया लईका मन ह उपाधि पा के बाना उंचाए हे ओ मन संस्कार मन ल अपनात राष्ट्र निर्माण म अपन योगदान देवव। ये बात राज्यपाल सुश्री उइके ह आज पंडित रविशंकर शुक्ल विश्वविद्यालय के 25वां दीक्षांत-समारोह ल संबोधित करत कहिन। उमन उपाधि अऊ स्वर्ण पदक पवइया सबो पढ़ईया लईका मन ल हार्दिक शुभकामना दीन। ये बेरा म राज्यपाल, मुख्यमंत्री संग आन अतिथि मन ह शोधार्थी मन ल उपाधि अऊ प्रावीण्य सूची म स्थान पाए पढ़ईया लईका मन ल स्वर्ण पदक देके सम्मानित करिन।
राज्यपाल ह कहिन कि प्रदेश के उच्च-शिक्षण संस्थान अऊ विश्वविद्यालय मन के ये महत्वपूर्ण दायित्व हे कि ओ मन अभी हाल के युवा पीढ़ी अउ भावी पीढ़ी बर उच्च स्तरीय शैक्षणिक माहौल तियार करयं ताकि ऊंखर अऊ मानव-जाति के विकास के रद्दा परखर हो सकय। संगेच अइसन शैक्षणिक प्रणाली विकसित करना चाही जऊन ए युवा मन ल अपन देश के संस्कृति, अनुशासन, संयम अऊ अध्यात्म ले प्रत्यक्ष जोड़ सकय। उमन कहिन कि युवा-वर्ग ले मोर अपेक्षा हे कि वो मन न सिरिफ आत्मनिर्भर बनत पारिवारिक अउ सामाजिक दायित्व मन ल सहर्ष पालन करयं भलुक अपन नैतिक मूल्य मन ल घलोक बने सहिन समझयं। ये मूल्य ही आगू राष्ट्र-मूल्य बनके हमला देश अऊ समाज के प्रति अपन कर्तव्य के पालन कराना सिखाथे। सुश्री उइके ह कहिन कि देश अऊ समाज के समकुल विकास बर वैज्ञानिक उन्नति तो जरूरी हेच फेर हमला अपन जमीन ल नइ छोड़ना हे, जेमां ले हम आगू बढ़े हवन। हमला ए मूल्य मन के हमेसा सुरता रखना चाही।
मुख्यमंत्री श्री भूपेश बघेल ह उपाधि अऊ पदक प्राप्त करइया शोधार्थी-विद्यार्थी मन ल शुभकामना दीन अऊ कहिन कि जऊन विद्यार्थी शोध करे के इच्छुक हें, ओ मन अइसन विषय के चयन करव, जेकर अभी हाल परिवेश म जादा जरूरत हे। विश्वविद्यालय ले उपाधि पवइया युवा अपन रोजगार अऊ कैरियर के संग सामाजिक जिम्मेदारी मन के निर्वाह म घलोक अपन भूमिका निभावयं।
