श्रम मंत्री डॉ. डहरिया ह हितग्राही छात्र मन ल चेक दे के छात्रवृत्ति वितरण के करिस शुभारंभ
रायपुर, नगरीय प्रशासन, विकास अऊ श्रम मंत्री डॉ. शिवकुमार डहरिया ह आज रायपुर म छत्तीसगढ़ श्रम कल्याण मंडल के शैक्षिणिक छात्रवृत्ति योजना के अंतर्गत मजदूर मन के बालक-बालिका मन ल साल 2021-22 बर हितग्राही छात्र-छात्रा मन ल चेक प्रदान कर के छात्रवृत्ति वितरण करिस। राज्य के कई जिला मन बर करीब 1682 मजदूर मन के लइका मन ल 42 लाख 33 हजार 500 रूपिया के छात्रवृत्ति के वितरण चेक अऊ आरटीजीएस के माध्यम ले करे गीस।
श्रम मंत्री डॉ. डहरिया ह कहिन कि श्रम विभाग के अधिकारी मन ल छत्तीसगढ़ श्रम कल्याण मंडल के शैक्षणिक छात्रवृत्ति योजना के तहत पंजीकृत मजदूर मन के सबो बालक-बालिका जेन स्कूल अऊ कॉलेज म अध्ययनरत हे, ओ मन ल लाभांवित करव। उमन हितग्राही छात्र-छात्रा मन ल मेहनत अऊ लगन ले अध्ययन करे ल कहिन। उमन कहिन कि छात्र मन ल छत्तीसगढ़ शासन कोति ले मदद देहे जाही। श्रम कल्याण मंडल के अधिकारी मन ह बताइन कि मजदूर मन के अध्ययनरत लइका मन ल कक्षा पहली ले आठवीं तक एक हजार 500 रूपिया, कक्षा नवमी ले बारहवी तक तीन हजार रूपिया, स्नातक स्तर बी.ए., बी.कॉम, बी.एस.सी., आईटीआई अऊ नर्सिंग आदि ल पांच हजार रूपिया, स्नातक स्तर के व्यवसायिक पाठ्यक्रय इंजीनियरिंग, मेडिकल अऊ आन छात्र मन ल आठ हजार रूपिया अऊ स्नातकोत्तर के छात्र मन ल दस हजार रूपिया के छात्रवृत्ति हर बछर देहे के योजना हे।
ये बेरा म श्रम कल्याण मंडल के अध्यक्ष, श्री शफी अहमद, आयुक्त श्री दिव्यांश सिन्हा संग संचालक मंडल के सदस्य श्री शारिक रईस खान, श्री मनोज सिंह ठाकुर, श्रीमती अंबालिका साहू, श्री नरेश देवांगन, श्री झुमुक साहू, श्री नवीन सिंह अऊ मंडल के अधिकारी मौजूद रहिन।
