दिव्यांग महाविद्यालय चलावत हे ऑनलाईन प्रशिक्षण कक्षा
रायपुर, 12 मई 2020। कोविड-19 महामारी के सेती ये बेरा म पूरा विश्व लॉकडाउन के विषम परिस्थिति मन के सामना करत हे। कोरोना वायरस के संक्रमण ले बचाव अऊ रोकथाम बर सबो शिक्षण संस्था मन बंद हें। ए परिस्थिति म समाज कल्याण विभाग ह दिव्यांग पढ़ईया लईका मन बर ऑनलाईन पढ़ाई अऊ रचनात्मक गतिविधि संचालित करके समय के सदुपयोग करावत हे। विभाग ह राजधानी रायपुर के माना म संचालित शासकीय दिव्यांग महाविद्यालय ले नवाचार करत नेत्रहीन अऊ अस्थिबाधित पढ़ईया लईका मन बर ऑनलाईन संगीत प्रशिक्षण कक्षा चलावत हे। अपन-अपन घर ले लइका मन शिक्षक मन के मदद ले विडियों कॉल, ऑडियो कॉल, कॉन्फ्रेंस कॉल के माध्यम ले गायन, वादन करके सुर-साधना करत हें। एखर से विद्यार्थी मन के न सिरिफ पढ़ाई सुचारू रूप ले चलत हे भलुक ओ मन व्यस्त रहिके मानसिक रूप ले मजबूत होवत हें।
महाविद्यालय के प्राचार्य श्रीमती शिखा वर्मा ह बताइस के महाविद्यालय इंदिरा कला संगीत विश्वविद्यालय खैरागढ़ ले मान्यता प्राप्त हे। ये छत्तीसगढ़ के एकमात्र दिव्यांग महाविद्यालय हे जिहां दृष्टिबाधित, अस्थिबाधित, मूक-बधिर लइका मन शास्त्रीय गायन अऊ तबला बादन अऊ चित्रकला के विधिवत शिक्षा प्राप्त करत हें। ये लइका मन छत्तीसगढ़ के कई क्षेत्र मन म निवास करथें। महाविद्यालय के शिक्षक श्री लाल राम लोनिया अऊ श्री गौरव पटेल ह सरलग मोबाईल के माध्यम ले ऑनलाईन अध्यापन करावत हें। उमन बतान के अधिकांश लइका ग्रामीण क्षेत्र ले होए के सेती इनला अधिकतर नेटवर्किंग के समस्या के सामना करना परथे, एखर बावजूद ओ मन मा संगीत सीखे के प्रति अतका लगन हे के वोमन नेटवर्क वाले जगा खुदे खोज लेथे। कोण्डागांव जिला के बी.पी.ए. छटवा सेमेस्टर के दृष्टिबाधित विद्यार्थी अनिल मंडावी ल अक्सर नेटवर्क के समस्या होथे, फेर वो गांव म नेटवर्क क्षेत्र खोज के अपन गायन के शिक्षा ग्रहण करत हे। अइसनहे कांकेर जिला के भानुप्रतापपुर डोंगर के रहइया उमलेश्वरी दर्रो अपन पढ़ाई घर के छत म, त कभू अंगना म जाके पूरा करथे। संगीत शिक्षा के प्रति लइका मन बहुतेच सजग हें अऊ रूचि से सीखत हें, एखर सेती महाविद्यालय के शिक्षक मन घलोक पढ़ईया लईका मन के हालत अऊ समय मुताबिक ओ मन ल गायन, वादन के शिक्षा देवत हें। दिव्यांग महाविद्यालय के लइका मन ह ये साबित कर देखाए हें के कहूं आप में कोनो काम ल करे के लगन, दृढ़ इच्छा शक्ति हे त कोनो काम असम्भव नइ हे।