उप स्वास्थ्य केन्द्र खल्लारी ल अंतर्राष्ट्रीय सार्वभौमिक स्वास्थ्य दिवस म मिलही सम्मान

कोण्डागांव, भारत सरकार के स्वास्थ्य अउ परिवार कल्याण मंत्रालय कोति ले 12 दिसम्बर के अंतर्राष्ट्रीय सार्वभौमिक स्वास्थ्य कवरेज दिवस मनाए जात हे। जेमां मंत्रालय कोति ले हर एक राज्य ले प्राईमरी हेल्थ केयर के बेहतर अनुप्रयोग करत हेल्थ एंड वेलनेस सेंटर के उत्कृष्ट प्रबंधन बर सम्मानित करे जाही। एखर बर छत्तीसगढ़ ले राष्ट्रीय स्वास्थ्य मिशन छत्तीसगढ़ के कोण्डागांव के बड़ेराजपुर विकासखण्ड स्थित हेल्थ एंड वेलनेस सेंटर, उप स्वास्थ्य केन्द्र खल्लारी के प्राईमरी हेल्थ केयर टीम ल नामांकित करे गए हे। ये टीम अंतर्राष्ट्रीय सार्वभौमिक स्वास्थ्य कवरेज दिवस म 12 दिसम्बर के आयोजित कार्यशाला म घलोक हिस्सा लेही। जेमां कई राज्य मन ले आये प्राईमरी हेल्थ केयर टीम मन के नवाचार, बलदत तकनीक अउ नवा चुनौती मन के संबंध म चर्चा करे जाही। जिहां खांटी जानकार कोति ले ओ मन ल मार्गदर्शन घलोक देहे जाही। एखर बर हेल्थ एंड वेलनेस सेंटर के सीएचओ, एएनएम अउ आशाकर्मी दिल्ली स्थित कार्यशाला म डीपीएम सोनल ध्रुव के नेतृत्व म जाहीं।
ये उपलब्धि म सीएमएचओ डॉ. टी.आर. कुंवर ह खल्लारी हेल्थ एंड वेलनेस के टीम ल बधाई देहे हें। ये टीम 10 दिसम्बर के दिल्ली बर रवाना होही। जिहां केन्द्रीय स्वास्थ्य अउ परिवार कल्याण मंत्री मनसुख मांडविया अउ मंत्रालय के वरिष्ठ अधिकारी मन के उपस्थिति म 12 दिसम्बर के पुरस्कार प्रदान करे जाही।