मंत्री गुरु रुद्रकुमार ले मिलिन वेट लिफ्टर लहरे बंधु: मंत्री ह पदक जीते म दीन बधाई

रायपुर, 21 अगस्त 2021। लोक स्वास्थ्य यांत्रिकी अउर ग्रामोद्योग मंत्री गुरु रुद्रकुमार ले आज ऊंखर निवास सतनाम सदन म खेल जगत के राष्ट्रीय स्तर म राज्य के नाम रौशन करइया वेट लिफ्टर लहरे बंधु ह सौजन्य मुलाकात करिस। पाछू 9 ले 12 अगस्त 2021 तक पटियाला पंजाब म आयोजित सीनियर, जूनियर अउर सब जूनियर नेशनल वेटलिफ्टिंग चैंपियनशिप म छत्तीसगढ़ प्रदेश वेटलिफ्टिंग टीम कोति ले रायपुर जय सतनाम व्यायाम शाला के 8 खिलाड़ी मन ह भाग लेहे रहिन। एमां ले 7 खिलाड़ी अउर प्रशिक्षक सबो सतनामी समाज ले हे।
जानबा हे कि नेशनल वेटलिफ्टिंग चैंपियनशिप म श्री सुभाष लहरे ह 67 किलोग्राम वर्ग म स्वर्ण पदक अऊ ऊंखर छोटे भाई श्री करण लहरे ह 55 किलोग्राम वर्ग म रजत पदक जीत के प्रदेश के मान बढ़ाइन। ये बेरा म लहरे बंधु ह मंत्री गुरू रूद्रकुमार ले प्रदेश के खिलाड़ी मन बर विशेष डाईट अऊ आन जरूरी सुविधा संबंधी मांग मन ल रखिस। मंत्री गुरु रुद्रकुमार ह उंखर मांग मन ल शासन के आगू रखे के बात कहीन। उमन लहरे बंधु मन के ये कामयाबी बर बधाई अऊ शुभकामना देके ऊंखर उज्जवल भविष्य के कामना करिन। ये बेरा म टीम के प्रशिक्षक श्री अजय दीप सारंग, श्री विजय महेश्वरी, श्री कोमल माहेश्वरी, श्री राजा भारती, श्री भावेश सारंग, श्री हंसराज मार्कण्डेय अऊ श्री लक्की मरकाम उपस्थित रहिन।