खुसी बांटे ले जीवन म भरथे खुसी के रंग: श्री भूपेश बघेल

रायपुर, मुख्यमंत्री श्री भूपेश बघेल रंग के पर्व होली के अवसर म राजधानी रायपुर के सुभाष स्टेडियम म आयोजित होली मिलन समारोह म सामिल होइन। उमन निगम परिवार कोति ले आयोजित समारोह म प्रदेशवासी, निगम के पदाधिकारी, अधिकारी-कर्मचारी, सफाई कामगार मन ल होली परब के बधाई अऊ शुभकामना दीन। महापौर श्री ढेबर ह गौठान म महिला स्वसहायता समूह मन कोति ले गोबर ले बने गुलाल ले तिलक लगाके मुख्यमंत्री श्री भूपेश बघेल के स्वागत करिन अऊ ओ मन ल शुभकामना दीन।
मुख्यमंत्री श्री बघेल ह प्रदेशवासी मन ल शुभकामना देवत कहिन कि होली रंग अऊ खुसी के तिहार ये। जुन्ना गिला-शिकवा भुलाके सबो ये तिहार ल मिल-जुलके मनाथें, तभे जीवन म खुसी के रंग चढ़थे। उमन कहिन कि ये परब के समय शहर म सौहार्द्रपूर्ण अच्छा वातावरण रहय, लइका, सियान, नौजवान सबो मिलके ये परब ल मनावव अऊ आपस म होली के खुसी बांटव। मुख्यमंत्री ह नगर निगम के महापौर ले कहिन कि होली के परब के समय शहर के साफ-सफाई अऊ पानी सप्लाई के व्यवस्था ल सुचारू रखे के जरूरत हे। काबर के ये परब म सबले जादा उपयोग पानी के होथे।
ये बेरा म नगर निगम रायपुर के सभापति श्री प्रमोद दुबे, राज्य महिला आयोग के अध्यक्ष डॉ. श्रीमती किरणमयी नायक, राज्य योग आयोग के अध्यक्ष श्री ज्ञानेश शर्मा, नगर निगम के बहुत अकन पदाधिकारी, पार्षद अऊ नागरिक बड़ संख्या म उपस्थित रहिन।