बेमेतरा, कुछ साल पहिली गोबर बेंचके अपन आजीविका सुधार पाना वाले बात ल कोनो सोचे नइ रहिन, फेर प्रदेश सरकार कोति ले संचालित गोधन न्याय योजना ले ये संभव हो सके हे। इही कड़ी म बेमेतरा विकासखण्ड के गौठान ग्राम दमईडीह ग्राम पंचायत गिधवा, पोस्ट दाढ़ी निवासी शिव कुमार यादव पिता मुन्ना यादव, जेन एक गरीब किसान अऊ गौ पालक हे, ये योजना के अंतर्गत अब तक 99 हजार 814 किलोग्राम गोबर बेचे हे। जेकर से एक लाख 99 हजार 628 रूपिया ओला मिले हे। मुख्यमंत्री भूपेश बघेल के योजना ल शुरू करे के उद्देश्य पशुपालक मन के आय म बढ़ोतरी करना, आवारा पशु मन के संरक्षण, महिला मन ल रोजगार के नवा अवसर प्रदान करना, जैविक कृषि ल बढ़ावा देना आदि हे। इही उद्देश्य ल कृतार्थ करे हे शिवकुमार यादव अउ ओखर जइसे आन पशुपालक मन के कहानी योजना ल सफल बनाए हे।
किसानी ले होवइया आमदानी ले घर चला पाना मुश्किल होत रहिस। तभे गोधन न्याय योजना के बारे म जानके शिवकुमार यादव ह गोबर बेचना चालू करिस अऊ सिरिफ दू बछर म करीबन 2 लाख रूपिया के अपन आय म बढ़ोतरी करिस। अब ओखर परिवार के स्थिति अच्छा हे। ओ ह ये पइसा ले दूध बेचे बर मोटर साईकिल बिसाए हे। अब वो मोटर साईकिल के माध्यम ले दूध बेचके अपन आय म बढ़ोतरी करत हे अऊ आन जरूरत मन ल पूरा करत हे। गौठान ले होए आय म बढ़ोतरी के सेती वो ह अपन खरचा म गौठान म भगवान श्री कृष्ण जी के मूर्ति स्थापना करे हे। शिवकुमार यादव कहिथे कि गोधन न्याय योजना ह मोर परिवार के अड़बड़ मदद करे हे। जेखर से मै ह अपन परिवार के जरूरत मन ल आसानी ले पूरा करे हंव।
ग्राम गौठान प्रबंधन समिति दमईडीह म ये योजना के चालू होए के दिन ले अब तक 3 लाख 10 हजार 803 किलोग्राम गोबर के खरीदी करे गए हे। जेकर लागत 6 लाख 21 हजार 606 रूपिया हे। जेखर से एक लाख 18 हजार 315 किलोग्राम खाद के उत्पादन होए हे। जेन ल किसान मन बिसा के जैविक खेती कोति एक कदम बढ़ाए हें। अबतक ग्राम गौठान प्रबंधन समिति दमईडीह ह 11 लाख 28 हजार 100 रूपिया के खाद बेच डरे हे। जेन गोधन न्याय योजना के सफलता के चिन्हारी हे।
