ऑयल पाम के खेती ले बदलीस किसान मन के किसमत

राष्ट्रीय खाद्य तेल मिशन के तहत रचे गीस सफलता के मिसाल

गरियाबंद, छुरा विकासखंड के गाँव कसहीबाहरा (बेहरामाड़ा) के रहइया श्री रामबरन वर्मा ह राष्ट्रीय खाद्य तेल मिशन-ऑयल पाम योजना के माध्यम ले खेती-किसानी मं नवा पहल करे हे। ओ ह बछर 2025-26 मं नेचर कृषि फार्म समूह बनाके ऑयल पाम के आधुनिक खेती अपनाइन। श्री वर्मा करा लगभग 20 हेक्टेयर खेती लइक भुइयाँ हे। ओ ह पहिली धान के संग दुसर फसल बोवत रहिस। उद्यानिकी विभाग के अधिकारी मन ले ऑयल पाम योजना के जानकारी मिले के बाद ओ ह बोर खनन, फेंसिंग, ड्रिप सिंचाई अउ रख-रखाव अनुदान जइसे सुविधा मन के लाभ उठाइस। ओ ह ड्रिप सिंचाई तकनीक के संग ऑयल पाम के रोपाई करिस अउ बीच-बीच मं आमा, शहतूत अउ भाजी-पाला के खेती सुरू करिस। एकर से भुइयाँ के सुघर उपयोग होईस, संग मं ओमन ला जादा मुनाफा घलो होए लागिस।
अउ अभी ओकर कोती ले समूह बनाके लगभग 50 एकड़ मं ऑयल पाम के रोपाई करे गए हे। एला देखके तीर-तखार के किसान मन घलो प्रेरित होके राष्ट्रीय खाद्य तेल मिशन-ऑयल पाम योजना के लाभ लेहे बर आगु आवत हे। उद्यानिकी विभाग के अधिकारी मन बताइन के आधुनिक तकनीक अउ सरकारी योजना मन के सही उपयोग करके किसान अपन आय मं बढ़ोतरी कर सकथें। समूह के माध्यम ले लगाए गे ऑयल पाम के रोपाई जिला के किसान मन बर मिसाल बन गे हे।