‘सुगंधित कोण्डानार परियोजना’ ले कोण्डागांव जिला ल मिलही नवा पहिचान: दाउ भूपेश बघेल

रइपुर, 20 जून 2021 इतवार। मुख्यमंत्री दाउ भूपेश बघेल ह आज कोण्डागांव जिला म सुगंधित फसल के खेती ल बढ़ावा देहे ब​र लगभग 20 करोड़ रूपिया के लागत के ‘सुगंधित कोण्डानार‘ (एरोमेटिक कोण्डानार) परियोजना के वर्चुअल शुभारंभ करीन। एमें कोण्डागांव जिला म 2 हजार एकड़ भूमि म सुगंधित फसल के खेती करे जाही। परियोजना के तहत लेमन ग्रास, पामारोजा, पचौली, मुनगा, अमाड़ी, वैटीवर, तुलसी के खेती करे जाही। सुगंधित फसल मन ल प्रोसेसिंग बर कोण्डागांव म स्थापित होवइया प्रसंस्करण इकाई म भेजे जाही। एकर ले जुड़े किसान मन ल प्रति एकड़ सालाना लगभग एक लाख रूपिया के आमदनी होही।
सुगंधित फसल मन के प्रसंस्करण ले एसेंशियन ऑयल तियार करे बर प्रसंस्करण यूनिट कोण्डागांव म लगाय जाही। जेकर आज कार्यक्रम के बेरा सन फ्लेक एग्रो प्रायवेट लिमिटेड अउ कोण्डागांव जिला प्रशासन के बीच एमओयू म हस्ताक्षर करे गइस ।