गन्ना के फसल ले लहराइस अमृत, लक्ष्मण, भांटासाय के खेत
खनिज न्यास निधि मद ले 71 हैक्टेयर क्षेत्र म बगीचा विकासखंड के किसान मन ह लगाए हें गन्ना
जशपुरनगर, 16 अक्टूबर 2020। जशपुर जिला म किसान मन के आमदनी के मुख्य जरिया खेती बाड़ी हे। दूरस्थ अंचल ग्रामीण क्षेत्र मन म आदिवासी जनजाति निवास करथें अऊ अपन खेत मन म धान के पैदावार के संग अकतहा आमदनी बर बाड़ी म साग-सब्जी के उत्पादन करके घलोक अकतहा आमदनी कमाथें। कृषि विभाग ह किसान मन ल आर्थिक रूप ले समृद्ध बनाए बर छत्तीसगढ़ शासन के योजना ले लाभांवित तको करत हे। संगेच उमन ल आधुनिक तकनीकी खेती के बारे म घलोक बताए जात हे, तेकर से गांव-गंवई म रहईया किसान मन आधुनिक तकनीकी के खेती करके कम लागत ले बने आमदनी कमा सकयं।
इही कड़ी म कृषि विभाग ह किसान मन के मदद करे खातिर अऊ खेती ले उंखर आमदनी जादा बढ़ाए के खातिर बहुत झन किसान मन ल जोड़के बगीचा विकासखंड म पायलेट प्रोजेक्ट के तहत् खनिज न्यास निधि मद ले 71 हैक्टेयर क्षेत्र म गन्ना के खेती करवावत हे। बगीचा किासखंड के ग्राम पतरापारा के किसान भाटासाय के 1.600 हेक्टेयर खेत म गन्ना के फसल लगाए गए हे। जुजगू के किसान अमृत राम के 1.000 हेक्टेयर खेत म गन्ना के फसल लगाए गए हे। संगेच गुडलू गांव के किसान लक्षण के 0.800 हेक्टेयर खेत म गन्ना के फसल लगाए गए हे।
कृषि विभाग के बताती पहली पइत नगदी फसल गन्ना ल खनिज न्यास निधि मद ले विकासखंड बगीचा म माडल के तौर म कुल 71 हैक्टेयर गन्ना के उत्पादन करे जात हे। पालीबैग गन्ना प्रदर्शन जिला प्रशासन के सहयोग ले स्वीकृत करके पौधा रोपण के काम करे गए हे। जेखर से फसल के उचित दाम किसान मन ल मिलही अऊ किसान मन के आर्थिक स्थिति म सुधार के संग ऊंखर आय म बढ़ोतरी होही।
