सुकमा। नक्सली मन ह एक डीआरजी जवान ल अगवा करके ओखर हत्या कर दिस। एखर बाद गुरुवार बिहनिया शव ल गांव के बाहर फेंक दिस। ग्रामीण मन ह जवान के शव देखिन त परिजन मन ल सूचना दीन। वहीं सूचना मिले म पुलिस घलो मौका म पहुंचगे। जवान होली के एक दिन बाद ही घर आये रहिस। घटना के पुष्टि सुकमा एसपी शलभ सिन्हा ह करिस हे।
जानकारी के मुताबिक, डीआरजी जवान कड़ती कन्ना दोरनापाल म पदस्थ रहिस। वो होली के अगला दिन बुधवार के अपन पत्नी के संग गृहग्राम आरगट्टा आइस अउ पंचायत के बैठक म घलो शामिल होइन। बताये जावत कि बुधवार देर रात कुछ लोग सादा कपड़ा मन म ओखर घर पहुुंचीन अउ अपन संग अगवा करके लेगे। अगला दिन गुरुवार बिहनिया गांव के बाहर ग्रामीण मन ह ओखर शव ल पड़े हुए देखिन त परिजन मन ल सूचना दीन।
सूचना मिले म दोरनापाल थाना ले पुलिस अउ अधिकारी घलो मौका म पहुंचगे। आशंका जताये जावत हे कि नक्सली मन ह ओखर अपहरण करे के बाद हत्या करे हे। हालांकि अभी तक घटना ल लेके कोनो ह जिम्मेदारी नई लेहे। पुलिस ह शव ल पोस्टमार्टम बर भेजवा देहे। एखर संग ही आगु के कार्रवाई करे जावत हे।
