सुकमा, 30 मार्च 2021। छत्तीसगढ़ शासन कोति ले किसान मन ल आगू बढ़ाए बर बहुत अकन योजना के संचालन करे जात हे, ए योजना मन के लाभ लेके किसान मन उन्नतशील खेती करत हें। इही कड़ी म सुकमा जिला के विकासखण्ड छिन्दगढ़ के पाकेला गांव के पेदापारा निवासी किसान सुकुलधर नाग ह आधुनिक कृषि तकनीक अऊ विभागीय योजना मन के लाभ लेके समृद्धि कोति आगू बढ़त हे। वो ह हर साल अपन 4 एकड़ जमीन म धान के अलावा अपन घर के बाड़ी ले आमदनी कमावत हे।
सुकुलधर के बताती अपन डेढ़ एकड़ बाड़ी म हर साल धान के फसल के अलावा अलग-अलग फसल लेथे, पाछू तीन चार बछर ले वो ह केरा के फसल तको लेहे हे, उहें पउर साल जोंधरी अऊ ये साल मूंग के फसल लेवत हे। एखर अलावा ओ ह मिर्चा, भांटा, पताल आदि साग सब्जी घलोक लगात हे। डेढ़ एकड़ बाड़ी के संग सुकुलधर तीर छोटकन डबरी घलोक हे, जेमां ओ ह मछरी पालत हे। घर के मवेशि अऊ कुकरी घलोक वोखर अकतहा आय के स्त्रोत हे। वो ह सिंचाई सुविधा बर कृषि विभाग ले अनुदान म बिजली पंप बोर अऊ क्रेडा विभाग ले सौर सुजला योजना ले सोलर पंप के संग ड्रीप सिंचाई स्थापित कराए हे। सुकुलधर के बाड़ी म करीबन 15 आमा के पेड़ हे, जेखर से ओ ला सालाना 20 हजार तक के आय होथे। चार नरियर के पेड़ घलोक हे, नरियर ल वो स्थानीय बजार अऊ दुकान म बेंच के करीबन 10 ले 15 हजार कमाथे। हर हफ्ता सनिच्चर के दिन स्थानीय बाजार म वो ह अपन बाड़ी म उगाए साग सब्जी बेचके बनेच आमदनी कमाथे। ए हिसाब ले बाड़ी ले ला हर साल 40 ले 50 हजार के अकतहा आमदनी होवत हे।
विभागीय योजना मन के लाभ लेके सुकुलधर करत हे खेती: केरा, आमा, जोंधरी संग मूंग के फसल ले होवत हे अकतहा कमई
