आदिवासी अंचल मन म बेटी मन के सशक्तिकरण के नवा कहानी

धरती आबा संतृप्ति शिविर के माध्यम ले 350 नोनी मन के खुलिस सुकन्या समृद्धि खाता
मोहला-मानुपर-अम्बागढ़- चौकी, छत्तीसगढ़ के आदिवासी बहुल मोहला-मानुपर-अम्बागढ़- चौकी जिला म बेटी मन के सुरक्षित अऊ उज्ज्वल भविष्य के दिशा म ऐतिहासिक कदम उठाए गए हे। धरती आबा जनजातीय ग्राम उत्कर्ष अभियान के अंतर्गत जिला के सबो 29 सेक्टर मुख्यालय मन म आयोजित धरती आबा संतृप्ति शिविर मन के माध्यम ले कुल 350 आदिवासी नोनी मन के सुकन्या समृद्धि खाता खोले गीस। ये पहल जिला प्रशासन  अऊ महिला अउ बाल विकास विभाग के समन्वय ले साकार होइस।
जिला कलेक्टर ह बताइस के ए उदीम के अंतर्गत अब तक जिला म 7500 ले जादा नोनी मन के सुकन्या खाता खुल गे हे, जेन नोनी मन के आर्थिक सशक्तिकरण के ठोस प्रमाण हे। विशेष बात ये हे के महतारी वंदन योजना ले मिलइया सहायता राशि ल कई माता मन ह अपन बेटी मन के भविष्य ल सुरक्षित करे बर सुकन्या खाता म प्रारंभिक निवेश के रूप म उपयोग करत हें। अधिकारी मन ह बताइन के ये सिरिफ खाता खोले के औपचारिकता नइ हे, बल्कि ये बेटी मन ल लेके सामाजिक सोच म सकारात्मक बदलाव लाय के दिशा म प्रभावशाली पहल हे। हमर प्रयास हे के कोनो पात्र बालिका ए योजना ले वंचित झन रहय।
ए उदीम ले न केवल जनजातीय समुदाय म बेटी मन के भविष्य ल लेके जागरूकता बाढ़े हे, बल्कि ये बेटी बचाओ, बेटी पढ़ाओ जइसे राष्ट्रीय अभियान मन ल स्थानीय स्तर म सशक्त आधार घलोक प्रदान करत हे। सरकार के योजना मन ल धरातल म उतारे के ये उत्कृष्ट उदाहरण अवइया समय म आन जिला मन बर प्रेरणादायक मॉडल बन सकत हे। ये पहल ये दर्शाथे के जब प्रशासनिक इच्छाशक्ति अऊ जनभागीदारी मिलथे, त विकास के अंजोर समाज के सबले दूरस्थ हिस्सा तक घलोक पहुंचथे।