चार एकड़ मं सन बीज के खेती ले लगभग चार लाख रूपिया आय के अनुमान, किसान उन्नति योजना ले घलो मिलही बढ़ावा
रायगढ़, जिला के लैलूंगा विकासखंड के गाँव केराटीकरा के किसान श्री सुखदेव सिदार ह पारंपरिक धान के खेती के संगे-संग फायदेमन्द दुसर फसल मन ला अपनाके फसल विविधीकरण के नवा मिसाल पेस करे हे। ए बछर ओ ह धान के रक़बा ला कम करत चार एकड़ मं सन बीज के खेती सुरू करे हे। कृषि विभाग के मारगदरसन मं करे गे ए नवा काम ले ओमन ला सुघर आय के आसा हे।
लगभग 40 ले 50 एकड़ मं खेती करइया श्री सिदार ला कृषि विभाग के माध्यम ले बीज निगम रायगढ़ ले सन के आधार बीज देहे गीस। चार एकड़ मं बोए गए ए फसल ले लगभग 30 कुंटल उपज के अनुमान हे। तियार बीज के वितरन बीज निगम रायगढ़ कोती ले करे जाही। 15 हजार रूपिया प्रति कुंटल के संभावित दर के हिसाब ले ओमन ला लगभग चार लाख रूपिया के आय होए के संभावना हे।
श्री सिदार आधुनिक खेती के संग अपन पारंपरिक कृषि धरोहर ला घलो आगु बढ़ावत हे। ओ ह ए बछर तीन ले चार एकड़ मं क्षेत्र के प्रसिद्ध महमहइया जवाफूल धान के खेती घलो करे हे। खेती के संगे-संग ओ ह डेयरी कारोबार ले घलो जुड़े हे। ओकर मन करा चार ले पाँच बढ़िया जात के गाय हवय, जेकर गोबर ले ओ ह जैविक खातू तियार करके अपन खेती मं उपयोग करथे। एकर ले खेती के खरचा कम होए के संग भुइयाँ के उपजाऊपन घलो बने रहिथे। एकर अलावा ओ ह वन विभाग के सहयोग ले लगभग तीन एकड़ मं सागौन के रुख घलो लगाए हे।
किसान उन्नति योजना ले मिलत हे फसल विविधीकरण ला बढ़ावा
मुख्यमंत्री श्री विष्णुदेव साय के पहल मं संचालित किसान उन्नति योजना के तहत धान के जगह दुसर फसल के खेती करइया किसान मन ला बढ़ावा देहे जात हे। पात्रता के मुताबिक श्री सुखदेव सिदार ला घलो योजना के लाभ मिलही। योजना के तहत दुसर फसल लेवइया किसान मन ला प्रति एकड़ 15 हजार रूपिया तक के सहायता के व्यवस्था हे।
रायगढ़ जिला मं फसल विविधीकरण ला बढ़ावा देहे बर किसान मन ला सरलग प्रेरित करे जात हे। कृषि विभाग उन्नत बीज, तकनीकी मारगदरसन अउ आधुनिक कृषि पद्धति के जानकारी देवत हे। कृषि विभाग के मुताबिक फसल विविधीकरण ले किसान मन के आय बढ़ाये के संगे-संग खेती ला जादा फायदेमन्द अउ थिर बनाये मं मदद मिलत हे।
