एक बछर म 5 लाख के कमाई, बिसाए बर दूर-दूर ले पहुँचथें गाँव के मइनखे
सुकमा के मीठ झींगा ह रायपुर के मंच म देवाइस सम्मान
सुकमा, भारत जइसे खेती-किसानी वाले देस म गाँव के आर्थिक दशा ला मजबूत करे बर अउ किसान मन के कमाई ला दुगुना करे खातिर सहायक धंधा मन ला सरलग बढ़ावा देहे जात हे। ए कड़ी म सुकमा जिला म “नीली क्रांति“ गाँव के बिकास, रोजगार अउ आत्मनिर्भरता के एक नवा अउ मजबूत आधार बनके आगू आए हे। कम लागत, कम समे म बढ़िया मुनाफा अउ बजार म बढ़त मांग के सेती मछरी अउ मीठा पानी म झींगा पालन के चलन गाँव-गाँव म बड़ तेजी से बढ़त हे। मुख्यमंत्री श्री विष्णु देव साय के खेती ला सिरिफ धान तक सीमित न रखके उद्यानिकी, दूध अउ मछरी पालन जइसे कमई वाले रद्दा ले जुड़े के गोहार के असर अब भुँइया म साफ दिखत हे।
सरकारी योजना मन ह दीस रोजगार ला पाँख
सरकार के भलाई वाले योजना मन आज गाँव के युवा मन अउ पुरखा मन के समे ले खेती करत किसान मन बर बड़ सहारा बनत हें। एकर सबले बढ़िया उदाहरण सुकमा जिला के दुब्बाटोटा म रहइया श्री मड़कम देवा हे, जेहा सरकारी योजना मन के लाभ उठाके झींगा अउ मछरी पालन ला अपन मुख्य धंधा बनाइस। मछरी पालन विभाग कोति ले ओला तरिया बनाए बर 7.20 लाख रूपया के लोन मंजूर करे गिस, जेमा 4.20 लाख रूपया के बड़का अनुदान सामिल रहिस। एकर संगे-संग, 24 घंटा पानी के सही सप्लाई बर क्रेडा विभाग कोति ले ओला छूट म सोलर पंप के अनमोल सुविधा घलो देहे गीस, जेहर ओकर रद्दा ला बड़ असान कर दीस।
सीख अउ लगन ले मिलिस 5 लाख के बंपर मुनाफा
मड़कम देवा ह सिरिफ पइसा के मदद के लाभ नइ लिस, भलुक कृषि विज्ञान केंद्र अउ कृषि विभाग ले समे-समे म आधुनिक मछरी पालन के तकनीकी सीख घलो पाइस। ए वैज्ञानिक तरीका अउ कड़ा मिहनत के नतीजा आय के ए बछर सिरिफ जून महीना म ही ओहा लगभग 2.50 क्विंटल झींगा अउ 15 क्विंटल मछरी के बंपर बिक्री करिस। ए उपज ले ओला करीब 5 लाख रूपया के शानदार कमाई होइस। झींगा पालन के क्षेत्र म सुकमा के नाम उज्जर करे बर बिस्व पशु चिकित्सा दिवस के मोका म रायपुर म रखे गए एक बड़े कार्यक्रम म कृषि मंत्री श्री रामविचार नेताम के हाथ ले मड़कम देवा ला सम्मानित घलो करे गीस। अब दूरिहा-दूरिहा ले मइनखे मन दुब्बाटोटा म मछरी अउ झींगा बिसाए बर आवत हें।