सुकमा, छत्तीसगढ़ सरकार के पुनर्वास नीति ले अब जंगल छोड़ के मुख्यधारा म लहुटे नक्सली मन के जिंदगी बदलत हे। मुख्यमंत्री विष्णु देव साय अउ उपमुख्यमंत्री विजय शर्मा के हुकुम म सुकमा जिला प्रशासन ह एक ठी जबर पहल करे हे। इहाँ सरेंडर करे 75 नक्सली मन ला 5G स्मार्टफोन अउ 25 युवा मन ला राजमिस्त्री (मेसन) किट बांटे गीस।
कलेक्टर अउ एसपी ह दीन सामान
कलेक्टर देवेश कुमार ध्रुव अउ एसपी किरण चव्हाण के मौजूदगी म ये कार्यक्रम होइस। 75 युवा मन ला सैमसंग के 5G मोबाइल देहे गीस, जेमा बढ़िया कैमरा अउ बैटरी हे। ये मोबाइल ले अब ये युवा मन ऑनलाइन पढ़ाई, खेती-किसानी के तकनीक अउ देश-दुनिया के खबर ले जुड़ सकहीं। उहें 25 झन ला घर बनाए के औजार (मेसन किट) मिलिस, ताकि वो मन राजमिस्त्री के काम करके अपन रोजी-रोटी कमा सकय।
बदल गे हे जिंदगी: पोड़ियम भीमा अउ रनवती के जुबानी
पोलमपल्ली के रहवइया पोड़ियम भीमा ह बताइस के वो 30 साल तक नक्सली संगठन म रिहिस, फेर अब सरेंडर करे के बाद ओला रहिवास, खाना अउ इलेक्ट्रीशियन-मैकेनिक जइसे काम सीखे के मउका मिलत हे।
पुवर्ती के मुचाकी रनवती ह बताइस के वो 24 साल तक जंगल म रिहिस। अब वो सिलाई अउ राजमिस्त्री के काम सीखत हे अउ बस्तर ओलंपिक म इनाम घलो जीते हे। डब्बमरका के गंगा वेट्टी ह कहिस के जंगल के जिंदगी ले अब के जिंदगी जादा सुरक्षित अउ सम्मान वाले हे। प्रशासन ह इंकर आधार कार्ड, आयुष्मान कार्ड अउ राशन कार्ड घलो बना देहे गए हे।
