कलेक्टर ह धान उपार्जन केन्द्र सुकुलदैहान अऊ अमलीपारा के करिन जांच

राजनांदगांव, कलेक्टर तारन प्रकाश सिन्हा ह राजनांदगांव विकासखंड के ग्राम सुकुलदैहान अऊ खैरागढ़ विकासखंड के ग्राम अमलीपारा के धान उपार्जन केन्द्र के निरीक्षण करिन। उमन समिति प्रबंधक मन ले बारिश ले धान के सुरक्षा बर कैप कव्हर ले ढांके के हुकुम दीन। उमन सबो एसडीएम ले कहिन कि धान खरीदी के व्यवस्था प्रभावित नइ होना चाही।
उमन धान उपार्जन केन्द्र मन म ड्रेनेज के समुचित व्यवस्था करे के निर्देश दीन। कलेक्टर ह कहिन कि किसान मन ल धान विक्रय करे म कोनो प्रकार के परेशानी नइ होना चाही। उमन कहिन कि लघु अऊ सीमांत किसान मन के धान प्राथमिकता के संग पहिली खरीदव। किसान मन ल सबले जादा सुविधा उपलब्‍ध कराना हे। उमन धान खरीदी केन्द्र म उपलब्‍ध सुविधा मन के अवलोकन करिन। उमन धान के उठाव अऊ बारदाना के संबंध म जानकारी लीन। उमन उहां धान तौलाई, कांटा-बांट, पेयजल, रखरखाव अऊ आन व्यवस्था के निरीक्षण करिन अऊ किसान मन ले बात करके व्यवस्था के संबंध म जानकारी लीन। किसान मन ह धान खरीदी के व्यवस्था के प्रति संतोष जाहिर करिन।
ये बेरा म एसडीएम श्री लवकेश ध्रुव उपस्थित रहिन। जानबा हे कि जिला म उदुपहा होए बारिश ले धान ल बचाय बर हरसंभव उदीम करे जात हे। कलेक्टर खुद सरलग धान खरीदी केन्द्र मन के मॉनिटरिंग करत हें। धान उपार्जन केन्द्र अऊ संग्रहण केन्द्र मन म कैप कव्हर ले धान के स्टैक सुरक्षित करे गए हे। जिला प्रशासन कोति ले धान के सुरक्षा बर युद्ध स्तर म प्रयास करे जात हे। धान के खरीदी के संगेच धान के उठाव के काम लगातार जारी हे। राईस मिलर्स अऊ ट्रांसपोटर्स मन अवकाश के दिनों म घलोक धान के उठाव सतत करत हें।