रायपुर, 22 अक्टूबर 2020। सुकमा के मशहूर इमली चस्का अब देशभर के बाजार मन म बेचाही। कलेक्टर श्री चंदन कुमार ह बुधवार के अरण्य प्रसंस्करण सहकारी समिति के बनाए इमली चस्का ल देश भर म बिक्री बर निकले वाहन ल हरी झंडी देखा के रवाना करिन। जानबा हे के सुकमा जिला म बने अमली चटनी ‘‘इमली चस्का’’ ल देश भर म पसंद करे जात हे। हआप जानतेच होहू के गांधी जयंती के दिन 2 अक्टूबर के जनजातीय कार्य मंत्रालय के अधीन काम करइया संस्था ट्राइबल कॉपरेटिव मार्केटिंग डेवलपमेंट फेडरेशन ऑफ इंडिया लिमिटेड (ट्राईफेड) ह ‘‘ट्राइबल इंडिया ई मार्केट प्लेस’’ के अन्तर्गत छत्तीसगढ़ ले एकमात्र सुकमा जिला के इमली चस्का उत्पाद ल लॉन्च करे रहिस।
अरण्य प्रसंस्करण सहकारी समिति के प्रबंधक ह बताइस के इमली चस्का ल देश भर म पसंद करे जात हे। पहिली घलोक दिल्ली, मुंबई जइसे बड़े शहर मन ले ऑर्डर मिलत हे, फेर ये पहली पइत हे के एके संग अतका बड़का खेप देश के प्रमुख शहर मन बर सुकमा ले भेजे जात हे। वोकर बताती 6 क्विंटल इमली चस्का देश के प्रमुख शहर जइसे दिल्ली, जयपुर, कोलकाता, चेन्नई, ओडिशा, सिक्किम, उत्तराखंड संग 16 जगा बर भेजे गए हे। एखर से करीबन 65 हजार रुपिया के आर्थिक आय होही। उहें प्रदेश म कोरबा, बेमेतरा अऊ रायपुर जिला म घलोक इमली चस्का विक्रय बर भेजे गए हे।
समिति के अध्यक्ष श्रीमती सोमारी कश्यप ह बताइस के शबरी मार्ट ले महिला स्व-सहायता समूह मन ल लाभ पहुंचाए जात हे। अमली चटनी के उत्पादन के संगेच समिति के महिला मन मसाला, दोना पत्तल, आचार, फिनायल अऊ आन उत्पाद घलोक बनावत हें, जेकर बिक्कट मांग हे। समिति के सदस्य अतका बड़का मात्रा म इमली चस्का के देशभर म सप्लाई ले अड़बड़ खुश हें।
