मुख्यमंत्री ह पंडित सुंदरलाल शर्मा के जयंती म ओ मन ल नमन करिन

रायपुर, मुख्यमंत्री श्री भूपेश बघेल ह स्वतंत्रता संग्राम सेनानी, समाज सुधारक अऊ प्रसिद्ध रचनाकार स्व. पंडित सुंदरलाल शर्मा के जयंती (21 दिसम्बर) के बेरा म छत्तीसगढ़ बर ऊंखर अमूल्य योगदान ल सुरता करत ओ मन ल नमन करे हें। श्री बघेल ह अपन संदेश म कहे हें कि पंडित सुंदरलाल शर्मा ह छत्तीसगढ़ के ग्रामीण इलाका मन म फइले अंधविश्वास, छुआ-छूत, रूढिवादिता जइसे कुरीति मन ल दूर करे बर अथक प्रयास करिन। सामाजिक चेतना के अवाज हर घर तक पहुंचाए के अविस्मरणीय काम उमन करिन। ओ मन स्वतंत्रता संग्राम के समय कई राष्ट्रीय आंदोलन मन ले जुड़े रहिन अऊ छत्तीसगढ़ म स्वाधीनता आंदोलन के मजबूती अऊ जनजागरण बर भरसक उदीम करिन। ओ मन किसान मन के अधिकार के लड़ाई के रूप म प्रसिद्ध कंडेल सत्याग्रह के प्रमुख सूत्रधार रहिन। श्री बघेल ह कहिन कि पंडित सुदरलाल शर्मा के व्यक्तित्व सदैव प्रेरणादायी रइही।