मोटर मैकेनिक बनके सुनीता बनिस सक्षम, प्रतिमाह कमावत दस हजार रुपिया

दंतेवाड़ा, 8 दिसम्बर 2020। छत्तीसगढ़ महिला कोष अंतर्गत प्रदेश म संचालित महत्वाकांक्षी योजना ‘‘सक्ष्म योजना‘‘ ले ऋण प्राप्त करके दंतेवाड़ा जिला के श्रीमती सुनीता कश्यप मोटर मैकेनिक के दुकान खोल के सक्षम बने हे। श्रीमती सुनीता ल मोटर मैकेनिक के कार्य ले प्रतिमाह दस हजार रुपिया के आमदनी होवत हे। वो अब समाज म स्वावलंबी बनके जीवन यापन करत हे। श्रीमती सुनीता ह ए मदद बर प्रदेश के मुख्यमंत्री श्री भूपेश बघेल ल धन्यवाद देवत हुए आभार व्यक्त करत हुए कहिन हे कि ए योजना जरूरतमंद महिला मन बर वरदान हे।

छत्तीसगढ़ महिला कोष के अंतर्गत संचालित सक्षम योजना के तहत श्रीमती सुनीता कश्यप ह 80 हजार रुपिया के ऋण लेके मोटर मैकेनिक के व्यवसाय शुरू करिन। मेहनत अऊ लगन ले एखर परिणाम आगु आए बर लगिस। वर्तमान म सुनीता दंतेवाड़ा के कतियासार चौक म मोटर मैकेनिक (जेके ऑटो सर्विस सेंटर) के दुकान खोल के 10 हजार रूपिया प्रतिमाह कमावत हे।

प्रदेश म महिला अऊ बाल विकास विभाग द्वारा छत्तीसगढ़ महिला कोष के अंतर्गत सक्षम योजना संचालित करे जावत हे। योजना के मुख्य उद्देश्य प्रदेश म गरीबी रेखा के नीचे जीवन यापन करइया महिला, विधवा, 35 ले 45 वर्ष के आयु के अविवाहित अथवा कानूनी तौर म तलाकशुदा महिला, ग्राम पंचायत या सामाजिक संस्था द्वारा जाति प्रमाण पत्र के आधार म परितक्यता महिला, जोन संकट ग्रस्त परिस्थिति म जीवन यापन करत हे, उमन ल स्वयं के व्यवसाय प्रारंभ करे बर आर्थिक मदद करना हे। योजना के अंतर्गत 6.50 प्रतिशत साधारण ब्याज के दर म एक लाख रूपिया तक के ऋण आसान किश्त मन म स्वीकृत करे जाथे।