गातापार पहुंचिन पुलिस अधीक्षक, सिविक एक्शन म लीन हिस्सा

राजनांदगांव, 10 मार्च 2021। पुलिस अधीक्षक डी. श्रवण बीते दिन अति संवेदनशील थाना गातापार के कटेमा पहुंचिन। इहां ओमन स्कूली बच्चा मन ल पढ़ाई बर सामग्री बांटीन। संग ही अंतर्राष्ट्रीय महिला दिवस म ग्रामीण महिला मन ल भोजन घलो कराइन। एसपी ह उपस्थित जनपद अध्यक्ष के प्रतिनिधि प्रकाश मंडावी व सरपंच कमलेश वर्मा सहित अब्बड़ झन ग्रामीण मन ले कई मुद्दा म चर्चा करिन। ग्राम कटेमा के महिला मन ल महिला दिवस म लुगरा व पुरुष मन ल धोती व गमछा बांटीन। बतादन कि पुलिस अधीक्षक ह निर्माणाधीन सड़क व बिजली व्यवस्था के घलो जानकारी लीन। ओमन बिजली के शिकायत म सोलर लाइट ल जल्द ठीक कराये के आश्वासन दीन। ये दौरान पुलिस अधीक्षक के संग खैरागढ के एसडीओपी जीसी पति समेत थाना प्रभारी व अन्य स्टाफ मौजूद रहिन।