रायपुर, ग्राम पंचायत बोड़रा के रहवइया किसान श्री चंदन साहू अउ श्रीमती रजनी साहू के सवा साल के बेटा सयांश अब सुपोषित होए कोति आगू बढ़त हे। सयांश के जन्म के समय म ओखर वजन सामान्य रहिस। जन्म के बाद ओखर तालू कटाए के सेती स्तनपान करे म कठिनाई होए लगिस अऊ सयांश के वजन अपेक्षाकृत नइ बाढ़िस। आंगनबाड़ी कार्यकर्ता श्रीमती सविता साहू कोति ले गृहभेंट करके वजन माप ले गीस, तब पता चलिस कि सयांश के वजन जन्म के अपेक्षा कम होत जात हे। एखर बाद सयांश ल जिला अस्पताल स्थित पोषण पुनर्वास केन्द्र म भर्ती कराए गीस। चिरायु दल कोति ले शिविर म कटे तालू के ऑपरेशन बर सयांश के चिन्हांकन करे गीस अऊ सयांश के वजन आठ किलोग्राम होए के बाद ऑपरेशन करे के बात कहे गीस।
हम आप ल बता देवन के प्रदेश म मुख्यमंत्री सुपोषण योजना शुरू करे गए हे जेमा कुपोषित लइका मन, गर्भवती अऊ शिशुवती माता मन ल अण्डा, दूध संग गरम पके भोजन दिए जाए के उदीम करे जात हे। उन्हें जिला के ग्राम पंचायत बोड़रा के सरपंच श्रीमती फुलवा बाई कोति ले कुपोषित मासूम सयांश ल गोद लेके ओला सुपोषित करे के उद्देश्य ले 12 सितंबर ले रोजेच एक लीटर दूध देहे जात रहिस। एखर से सयांश के वजन 4.7 ग्राम ले बढ़के अब 5.3 हो गीस। ऊंखर कोति ले ये दूध छः महिना तक दे जाही।
हम आप ल येहू बता देवन के ग्राम पंचायत बोड़रा म तीन आंगनबाड़ी केन्द्र संचालित हे, जेमां ले केन्द्र क्रमांक-01 रेड केन्द्र हे। इहां 12 ले जादा कुपोषित लइका हे, इहां 3-6 साल तक के 13 लइका मन म ले 07 मध्यम कुपोषित हे। अइसनहे 08 गर्भवती अऊ 07 शिशुवती माता दर्ज हे। केन्द्र ल यथासंभव पंचायत प्रतिनिधि मन कोति ले गोद लेके लड्डू बनाए के सामान अऊ चना-मूंग देहे जात हे। मुख्यमंत्री सुपोषण अभियान शुरू होए के बाद केन्द्र म महिला मन के उपस्थिति बाढ़े हे। दू लइका मध्यम कुपोषण ले सामान्य म आए हे, उन्हें तीन लइका मन के वजन म घलोक बदलाव आए हे।