गरियाबंद, 18 मई 2021। गरियाबंद जिला म कोरोना के संग लड़ई म आंगनबाड़ी कार्यकर्ता अऊ सहायिका मन हर मोरचा म डटे हें। उमन घर-घर जाके पूरक पोषण आहार देवत हें अऊ मनखे मन ल कोरोना संक्रमण अऊ नियंत्रण बर जागरूक करके टीकाकरण बर प्रेरित करत हें। कलेक्टर श्री निलेश कुमार क्षीरसागर के मार्गदर्शन म जिला म पूरक पोषण आहार कार्यक्रम के सफल क्रियान्वयन महिला अऊ बाल विकास विभाग कोति ले करे जात हे। विभाग कोति ले कोरोना संक्रमण के दुसर लहर म आंगनबाड़ी केन्द्र मन म जेन सेवा देहे जात रहिस हे वो सरलग चालू हे। ए सेवा मन म प्राथमिकता के आधार म सबो पात्र हितग्राही मन ल राष्ट्रीय खाद्य सुरक्षा अधिनियम 2013 कोति ले निरधारित प्रोटीन अऊ कैलोरी मानकयुक्त पूरक पोषण आहार (रेडी टू ईट) घर-घर पहुंचके देहे जात हे। विभाग कोति ले आंगनबाड़ी केन्द्र बंद रखे के बेरा तक आंगनबाड़ी केन्द्र अवईया 3 ले 6 साल के लइका मन, जे मन ल सामान्य परिस्थिति मन म स्थानीय स्व सहायता समूह के माध्यम ले गरम पके भोजन देहे जात रहिस हे वोकर जगा म गुणवत्तायुक्त रेडी टू ईट पोषण आहार प्रति हितग्राही प्रति दिवस निरधारित मापदण्ड के मुताबिक देहे जात हे।
अइसनहे गर्भवती माता मन ल घलोक गरम भोजन के जगा म सामान्य परिस्थिति मन म देहे जाए वाले रेडी टू ईट पोषण आहार के संग अकतहा रेडी टू ईट पोषण आहार देहे जात हे। महिला अऊ बाल विकास विभाग के जिला कार्यक्रम अधिकारी श्रीमती जगरानी एक्का ह बताइस के आंगनबाड़ी कार्यकर्ता अऊ सहायिका मन लइका अऊ गर्भवती धात्री महिला मन ल 15 दिन के अंतराल म महिना के पहिली अऊ तीसर मंगलवार के पूरक पोषण आहार घर-घर जाके देवत हें। उमन 6 महिना ले 6 साल के दर्ज सबो 58571 सामान्य अऊ मध्यम कुपोषित लइका मन ल प्रति हफ्ता 6 दिन के मान ले 750 ग्राम अऊ दर्ज सबो 934 गंभीर कुपोषित लइका मन ल 1200 ग्राम के रेडी टू ईट के पैकेट, 5190 गर्भवती व 5622 शिशुवती माता मन ल प्रति हफ्ता 6 दिन के मान ले 900 ग्राम के रेडी टू ईट के पैकेट देहे जात हे।