देससेवा के संकल्प अउ सफलता के उड़ान: मुंगेली के सुप्रिया सिंह बनिस लेफ्टिनेंट
मुख्यमंत्री श्री साय ह करिन सम्मानित, राज्य के नाव रोसन करे बर दीन बधाई अउ सुभकामना
रायपुर, मुख्यमंत्री श्री विष्णुदेव साय ह मंत्रालय महानदी भवन म स्थित अपन कार्यालय म सीडीएस (CDS) परीक्षा म ऑल इंडिया चौथा रैंक पवइया मुंगेली के सुश्री सुप्रिया ल सम्मानित करिन। ओमन सुप्रिया अउ ओकर परिवार ल गुलदस्ता भेंट करके बधाई अउ सुभकामना दीन अउ मुँह मीठा कराइन।
मुख्यमंत्री श्री साय ह कहिन के सुप्रिया के सफलता ए संदेस देथे के कहूं लक्छ साफ होही अउ मिहनत ईमानदारी ले करे जाही, त साधारण परिवार ले अवइया युवा घलो असाधारण जीत हासिल कर सकथे। ओमन कहिन के सुप्रिया के अनुशासन, मिहनत अउ देससेवा बर समर्पण ह राज्य के युवा मन बर प्रेरणा के सोत आय। मुख्यमंत्री ह कहिन के राज्य के युवा मन ल सुप्रिया ले प्रेरणा लेके अपन लक्छ ल पाए के रद्दा म आगू बढ़े के कोसिस करना चाही। ए मौका म मुंगेली कलेक्टर कुन्दन कुमार घलो उपस्थित रहिन।
बता दन के जिला के ग्राम टेढ़ाधौंरा के 23 बछर के सुप्रिया ठाकुर ह सीडीएस परीक्षा म ऑल इंडिया चौथा रैंक पाके मुंगेली जिला संग राज्य ल राष्ट्रीय स्तर म गौरवान्वित करे हे। अपन प्रतिभा, अनुशासन अउ देससेवा के अटूट संकल्प के जोर म ओकर चयन भारतीय सेना म लेफ्टिनेंट के पद बर होय हे। ए गौरव वाले उपलब्धि बर मुख्यमंत्री ह ओला सुभकामना दीन।
साधारण परिवेश ले असाधारण उपलब्धि तक
ग्राम टेढ़ाधौंरा के रहइया सुप्रिया सिंह श्रीनेत एक किसान परिवार ले आथे। ओकर महतारी श्रीमती संतोषी सिंह श्रीनेत अउ पिता श्री वैदेही शरण सिंह, जेमन पेसा ले किसान हें, ओमन सुप्रिया ल हमेसा ले शिक्षा अउ संस्कार के मजबूत आधार दीन। परिवार के मयारू अउ अनुशासित माहौल म पले-बढ़े सुप्रिया ह पहिली के पढ़ाई सेंट जोसेफ हायर सेकेंडरी स्कूल ले करिस। ओहा 10वीं म 71 प्रतिशत अउ 12वीं म 58 प्रतिशत नंबर लानिस। एकर बाद ओहा बी.टेक (इलेक्ट्रॉनिक एंड टेलीकम्युनिकेशन) म स्नातक के डिग्री लीस। इंजीनियरिंग के पढ़ाई के बखत ही ओहा एनसीसी (NCC) ल अपनाइस अउ अपन नेतृत्व के जोर म जूनियर अंडर ऑफिसर के पद तक पहुँचे रहिस। एनसीसी के ट्रेनिंग ह ओकर भीतर अनुशासन, साहस अउ देसभक्ति के भावना ल अउ मजबूत करिस। इहें ले भारतीय सेना म अधिकारी बने के ओकर संकल्प ह आकार लेहे बर धर लिस।
दृढ़ संकल्प अउ अथक मिहनत के परिणाम
बछर 2023 म इंजीनियरिंग पूरा करे के बाद सुप्रिया ह पूरा एकाग्रता के संग सीडीएस परीक्षा के तैयारी सुरु करिस। कड़ा मिहनत, रोज के अभ्यास अउ आत्मविश्वास के बल म ओहा शॉर्ट सर्विस कमिशन के तहत होय एसएसबी (SSB) इंटरव्यू म सुग्घर प्रदर्शन करत ऑल इंडिया चौथा रैंक हासिल करिस। ओकर ए सफलता ह सिरिफ एक झन के जीत नोहे, बल्कि गाँव-देहात के बेटी मन बर नवा रस्ता खोलइया एक प्रेरक कहानी आय। पढ़ाई अउ सेना के उपलब्धि के संगे-संग सुप्रिया ह सांस्कृतिक काम-काज म घलो आगू रहिथे। नृत्य ओकर मुख्य रुचि आय, जेहा ओकर व्यक्तित्व ल ऊर्जा अउ बिसवास देथे। सुप्रिया सिंह श्रीनेत के ए सफलता ह न केवल मुंगेली, बल्कि जम्मो प्रदेश बर गरब के बात आय।