गाँव, जिहाँ सुराज के बाद पहिली पइत डारिन वोट
देस ल सुराज मिले 76 बछर होगे हे अउ आज हम 18 वाँ लोकसभा के चुनई परब मनावत हावन। फेर देस म अइसनोहो गाँव हावय, जिहाँ इही बछर माने 2024 म लोकसभा के वोटिंग होइस हावय। सुरक्षा बल के जवान मन छत्तीसगढ़ के बस्तर जिला म नक्सल विरोधी अभियान म अभीन तक के सबले बड़का सफलता पाइस हे, येकर ये परिणाम होइस कि लाल आतंक के केन्द्र बस्तर के चांदामेटा गाँव म शुक्रवार के दिन इतिहास रचागे। सुराज के बाद इहाँ पहिली पइत लोकसभा चुनाव होइस हावय।
कभू नक्सलीमन के गढ़ माने जाए वाले ये गाँव म लोकसभा के पहिली चरण म 162 माइलोगन सम्मेत 325 पंजीकृत मतदातामन पहिली पइत लोकसभा उम्मीद्वार चुने बर मतदान करिन।
ध्यान देहे के बात ये हावय कि चांदामेटा म सुरक्षाकर्मीमन कोति ले षिविर लगाए ले गाँव के निवासीमन ल अपन सुरक्षा के आसरा मिलिस अउ उन बिगर कोनो डर के अपन लोकतांत्रिक अधिकार के प्रयोग करे बर घर ले बाहिर निकलिन।
ये गाँव म सुरक्षाबलमन के अबड़े जोरदरहा तैनाती करे गे रिहिसे। चांदामेटा के गाँव के लोगनमन के संगे संग तीर तखार के गाँव वालेमन तको अपन अंगरी म पहिली पइत चुनई स्याही लगवाइन। इहाँ वोटिंग मंझनिया तीन बजे संपन्न हो गिस।