सुराजी गांव अउ गोधन न्याय योजना गंवई अर्थव्यवस्था बर संजीवनी : मुख्यमंत्री दाउ भूपेश बघेल

रइपुर, 05 जुलाई 2021 सम्मार। मुख्यमंत्री दाउ भूपेश बघेल कहीन कि छत्तीसगढ़ सरकार कोति ले शुरू करे सुराजी गांव योजना अउ गोधन न्याय योजना ले गांव अउ गंवई जिनगी म एक नवा बदलाव दिखत हवय। एकर ले गंवईहा अउ किसान मन आसरा मिले हे अउ येह गंवई अर्थव्यवस्था बर संजीवनी साबित होवत हावय । मुख्यमंत्री दाउ भूपेश बघेल ये बात आज अपन घरू कार्यालय म, गोधन न्याय योजना के तहत राशि अंतरण के वर्चुअल कार्यक्रम ल सम्बोधित करत कहींन।
मुख्यमंत्री दाउ भूपेश बघेल ये बेरा म गोधन न्याय योजना के तहत कुल 9.83 करोड़ रूपिया राशि के ऑनलाइन अंतरण करीन, जेमें गोबर बेचइया मन ल 48 लाख रूपिया अउ गौठान समिति अउ महिला स्व-सहायता समूह मन ल लाभांश के रूप म 9.35 करोड़ रूपिया के राशि शामिल हे। मुख्यमंत्री ये बेरा म राज्य के पशुपालक किसान, गौठान समिति अउ महिला स्व-सहायता समूह के सदस्य माइलोगन मन ल बधाई अउ शुभकामना देवत कहीन येह हमार बर अबड़ खुशी के बात हे कि गौठान अब तेजी से स्वावलंबी बनत हावय । ये बेवस्था जतिक मजबूत होही हमार खेती-किसानी अउ किसान ओतके पोठ होही।
कृषि मंत्री श्री रविन्द्र चौबे ह कहीन कि छत्तीसगढ़ सरकार के गोधन न्याय योजना एक महत्वपूर्ण अउ महत्वाकांक्षी योजना हरे। राज्य म अब तक 48.56 लाख क्विंटल गोबर के खरीदी करे गे हे । एकर ले लगभग 19 लाख क्विंटल वर्मी अउ सुपर कम्पोस्ट के उत्पादन संभावित हवय, जोन कि क्रय गोबर के मात्रा के लगभग 40 प्रतिशत हे। अब तक लगभग 7 लाख क्विंटल वर्मी अउ सुपर कम्पोस्ट गौठान म तियार हो चुके हे। आज के स्थिति म 60 हजार भरे टाका ले वर्मी कम्पोस्ट के छनाई अउ पैकेजिंग के काम चलत हे। 42.20 करोड़ रूपिया के वर्मी कम्पोस्ट बिक चुके हे । योजना के तहत लाभांश के रूप म लगभग 29 करोड़ रूपिया के भुगतान करे जा चुके हे । येह छत्तीसगढ़ राज्य बर एक ठन बड़का उपलब्धि हरे।