पाटन ह सुराजी वीर मन के भूईयाँ हरे – मुख्यमंत्री दाऊ भूपेश बघेल

रायपुर 30 जुलाई 2023 इतवार। पाटन के भूईयाँ ह सुराजी वीर मन के भूईयाँ हरे। अंग्रेजी कुशासन के विरोध म आवाज उठाए के हिम्मत ये धरती के बेटा मन करीन हावय। हम उमन ल नमन करत हावन। ये बात दुरूग जिला के पाटन विकासखण्ड के गाँव दरबार मोखली म होवइया मनवा कुरमी क्षत्रिय समाज पाटन राज के डॉ. खूबचंद बघेल जयंती समारोह म मुख्यमंत्री दाऊ भूपेश बघेल ह कहीन। मुख्यमंत्री दाऊ भूपेश बघेल ह आज अपन एकदिनी जिला प्रवास के बेरा कलेक्टोरेट कार्यालय परिसर म छत्तीसगढ़ महतारी के प्रतिमा के मुँहदेखाई करीन। जिला प्रशासन कोति ले स्थापित करे जावत छत्तीसगढ़ महतारी के प्रतिमा ह 10फीट ऊँच हावय जेकर लागत 10 लाख रूपिया हावय। इहाँ वोमन सुराजी सेनानी स्वर्गीय श्री घनाराम बंछोर अउ स्वर्गीय श्री गैंदलाल बंछोर के प्रतिमा मुँहउघराई करे के संगे संग वोमन दरबार मोखली म 46 लाख 88 हजार रूपिया के लागत ले जल संसाधन विभाग के नवा नवा बने रेस्ट हाउस के लोकार्पण तको करीन। संगे संग उन ग्राम दरबार मोखली अउ सेमरी म एक करोड़ 21 लाख 75 हजार रूपिया के अबड़ अकन निर्माण कार्य के लोकार्पण तको करीन।
समारोह ल संबोधित करत दाऊ बघेल ह कहीन कि मोला ये बात के अबड़ खुशी हे कि दरबार मोखली मोर पड़ोसी गांव हरे, जिहां ले स्वतंत्रता संग्राम म हमार पूर्वज मन संघरीन। स्वर्गीय गैंदलाल बंछोर क्षेत्र के पहिली वकील रिहिन। गांधी जी ले प्रेरणा लेके वोमन सुराजी रन म संघरीन। उन मन ये बेरा म छतर सिंह ल जोन पत्र लिखे हें वोमा के विवरण देखबे त मिल जही कि कतेक कठिन संघर्ष हमर पूर्वजमन ह आजादी के लड़ाई के पइत करीन। डॉ. खूबचंद बघेल के गीत ’गजब विटामिन भरे हुए है, छत्तीसगढ़ के बासी मा’ गीत के उल्लेख करत उन मन कहीन कि हमार पूर्वज मन न केवल अंग्रेज मन ले सुराज चाहत रिहिसे भलकुन अइसन व्यवस्था चाहत रिहीन हावय जेन ह छत्तीसगढ़ी संस्कृति के प्रति गौरव होवय। हमन अपन पूर्वज मन के देखाए रद्दा म चलके छत्तीसगढ़ी संस्कृति ल सहेजे के दिशा म बूता करे गे हावयं।