बिलासपुर, 26 अगस्त 2020। राज्य शासन के महत्वाकांक्षी सुराजी योजना ले गांव वाले मन ल नवा दिशा मिल गए हे। ये योजना ले अब गांव मन के तस्वीर अऊ तकदीर दूनो बदले लगे हे। विकासखंड बिल्हा के ग्राम धौरामुड़ा के आश्रित गांव बरपाली म घलोक अब महिला मन ल स्वावलंबन के नवा रद्दा मिल गए हे। ए महिला मन ह एक समूह बनाके वर्मीकम्पोस्ट खाद बनाए के काम शुरू करे हें। बरपाली म ही बने गौठान म ओ मन कृषि विभाग के मदद ले वर्मीकम्पोस्ट अऊ नाडेप खाद बनावत हें। एखर पहिली ये समूह के महिला मन तीर आय के कोनो जरिया नइ रहिस, जेखर से ओ मन ल दूसर उपर आश्रित रहे ल परत रहिस फेर अब, ओ मन ल आर्थिक रूप ले कोनो दूसर उपर निर्भर नइ रहना परत हे।
लक्ष्मी स्वसहायता समूह म 10 सदस्य हे अऊ ओ मन ल वर्मीकम्पोस्ट खाद बनाए बर चार चरण म कृषि विभाग ले प्रशिक्षण लेहे हें। समूह के महिला मन ह 18 क्विंटल वर्मीकम्पोस्ट खाद के निर्माण करे हें अऊ 16 क्विंटल खाद के बिक्री ले करीबन 15 हजार ले जादा के राशि के आय अर्जित करे हें। अब उमन गोधन न्याय योजना के तहत घलोक खाद बनाए के काम शुरू करे हें। समूह के महिला मन के बताती आत्मनिर्भर होए ले उमन म आत्मविश्वास आए हे। अब ओ मन अऊ जादा मेहनत करके जादा ले जादा आय अर्जित करे के उदीम करहीं।
