- सुराजी गांव योजना ग्रामीण क्षेत्र मन म महिला जागृति अउ सशक्तिकरण के दिशा म मील के पत्थर
- महिला मन के मिनी राईस मिल अउ मल्ट्रीग्रेन मशीन ले बढ़ीस अमदानी
- वर्मी कम्पोस्ट निर्माण, वर्म बीज उत्पादन, सामुदायिक बाड़ी, मत्स्य पालन करत हें महिला मन
राजनांदगांव, सुराजी गांव योजना सुदूर वनांचल ग्रामीण क्षेत्र मन म महिला जागृति अउ सशक्तिकरण के दिशा म मील के पत्थर हे। स्वसहायता समूह के महिला मन ह एकता अऊ आत्मविश्वास ले स्वावलंबन बर कदम आगू बढ़ाएं हे। राजनांदगांव जिला म स्वसहायता समूह के राजनांदगांव के कारंवा उन्नति कोति अग्रसर हे। छुरिया विकासखंड के ग्राम मासूल आदर्श गौठान के महिला मन कई प्रकार के गतिविधि मन ले आर्थिक दृष्टिकोण ले मजबूत बनत हे। इंदिरा स्वसहायता समूह के महिला मन ह वर्मी कम्पोस्ट निर्माण अउ वर्म बीज उत्पादन अऊ बोरी विक्रय के काम ले प्राप्त लाभांश राशि ले मिनी राईस मिल अउ मल्ट्रीग्रेन मशीन खरीद उरे हें। जेखर से उंखर आमदनी म बढ़ोत्तरी होए हे। ये मशीन के माध्यम ले आटा पीसे, मसाला बनाए, भीगे उड़द के पिसाई अउ दाल के छीलका निकाले के काम करे जात हे।
कलेक्टर श्री तारन प्रकाश सिन्हा ह महिला समूह मन ल आत्मनिर्भर बनाए बर गौठान म सबो प्रकार के गतिविधि मन ल संचालित करे के हुकुम देहे हें। जेखर सुखद परिणाम ये हे कि गौठान मन म एके संग कई प्रकार के गतिविधि मन के संचालन ले महिला मन के आय म वृद्धि हो गए हे। गौठान के बाड़ी म मां दुर्गा स्वसहायता समूह कोति ले सामुदायिक बाड़ी म रकम रकम के सब्जि जिमीकंद, कद्दू, लौकी, अदरक अउर मुनगा के पौधा लगाए गए हे। फल अउ सब्जि मन के मल्टीलेयर खेती करे जात हे। शीतला स्वसहायता समूह के महिला मन मत्स्य पालन तको करत हें। उहें पूर्णिमा स्वसहायता समूह कोति ले मशरूम उत्पादन के काम संचालित करे जात हे। मासूल गौठान म मुर्गी पालन बर शेड के निर्माण घलोक करे गए हे।