जिला बाल संरक्षण टीम ह रुकवाइस दू नाबालिक मन के बिहाव

सूरजपुर, सूरजपुर जिला म कलेक्टर श्री एस. जयवर्धन के आदेश ले बाल बिहाव ऊपर प्रशासन के टीम ह कड़ा नजर रखत हे। जिला कार्यक्रम अधिकारी श्री शुभम बंसल के मार्गदर्शन म महिला अऊ बाल विकास विभाग ह सूरजपुर ला बाल बिहाव मुक्त जिला बनाय के कोति आगू बढ़त हे। जिला बाल संरक्षण अधिकारी श्री मनोज जायसवाल ला दू अलग-अलग विकासखण्ड सूरजपुर अऊ रामानुजनगर ले सूचना मिलिस के 16 बछर के दू झन लइका मन, जेमन ग्यारहवीं म पढ़त हें, ओकर मन के सगाई करके घर वाला मन बिहाव करे के तैयारी म हें।
खबर मिले के बाद, जिला बाल संरक्षण अधिकारी ह स्कूल मन ले दूनों लइका मन के उमर के जांच कराइस। जब दूनों के उमर 16 बछर पाय गिस, तब मौका म दू टीम भेजे गिस अऊ सगाई के बखत ही सबो झन ला समझाय गिस।
जिला बाल संरक्षण अधिकारी ह बताइस के छत्तीसगढ़ सासन ह ग्राम पंचायत के जम्मो सचिव अऊ महिला एवं बाल विकास विभाग के जम्मो पर्यवेक्षक मन ला ‘बाल विवाह प्रतिषेध अधिकारी’ बनाय हे। सबो के जिम्मेदारी हे के ओकर ग्राम पंचायत अऊ सेक्टर म बाल बिहाव झन होवय। संग म बाल बिहाव ले होय वाला नोकसान के बारे म घलोक जानकारी दीस।
‘बाल विवाह प्रतिषेध अधिनियम 2006’ के तहत सजा के बारे म घलोक बताय गिस। दूनों जगह लइका मन ला आगू के पढ़ाई जारी रखे अऊ शिक्षा ले ही सब कुछ पाय के समझाइस दीस। लइका अऊ ओकर परिवार वाला मन ह ‘पहले पढ़ाई फिर विदाई’ के बात ला मान लीन अऊ बेटी के शिक्षा ला जारी रखे अऊ उमर होय के बाद ही बिहाव करे बर तइयार होय हें। ए संबंध म पंचनामा अऊ कथन लिखवा के बिहाव ला रुकवा दे गिस।
बाल बिहाव रुकवाय म जिला बाल संरक्षण अधिकारी श्री मनोज जायसवाल, रामानुजनगर परियोजना अधिकारी सुश्री अनुराधा आर्या, सूरजपुर पर्यवेक्षक श्रीमती दीपा बैरागी, चाइल्ड लाइन ले श्री दिनेश यादव, श्रीमती यशोदा गुप्ता, अऊ पुलिस विभाग ले श्री शिवलोचन पैकरा अऊ श्री रामप्रकाश सामिल रहिन।