हिंसा से सेवा तक: वर्दी छोड़के अब होटल यूनिफॉर्म में नवा जिंदगी के शुरुआत करहीं 30 पूर्व माओवादी

बीजापुर, छत्तीसगढ़ के बीजापुर जिला के 30 आत्मसमर्पित माओवादी अब हिंसा छोड़ के सम्मान अउ आत्मनिर्भरता के रद्दा म आगू बढ़ गए हें। मुख्यमंत्री श्री विष्णुदेव साय के संवेदनशील सरकार ह इंकर जीवन संवारे खातिर विशेष पुनर्वास कार्ययोजना तैयार करे हे। एखर तहत जगदलपुर तीर आड़ावाल स्थित लाइवलीहुड कॉलेज म ए मन ल मुख्यमंत्री कौशल विकास योजना के अंतर्गत “गेस्ट सर्विस एसोसिएट” के व्यावसायिक प्रशिक्षण देहे जात हे।
तीन महीना के ए प्रशिक्षण म ये सबो पूर्व माओवादी ग्राहक सेवा, होटल प्रबंधन अऊ सॉफ्ट स्किल्स जइसे आधुनिक कार्यशैली सीखत हें। कभू जंगल म हिंसा के रद्दा अपनइया ये युवा अब बस्तर के होमस्टे, रिसॉर्ट्स अऊ पर्यटन स्थल मन म अतिथि सेवा के नवा अध्याय लिखइया हें।
एक पूर्व माओवादी (रामू – बदले नाम) ह भावुक होके कहिस, “पहिली जीवन म डर अऊ दर्द रहिस, अब सीखे अऊ आगू बढ़े के आजादी हे।” ए प्रशिक्षण के माध्यम ले ओ मन आत्मनिर्भर बनके अपन परिवार ल खुशहाल जीवन देना चाहत हें।
उपमुख्यमंत्री व गृहमंत्री श्री विजय शर्मा ह कहिन के मुख्यमंत्री श्री साय के अगुवई म पुनर्वास नीति के असर दिखत हे, अब युवा हिंसा छोड़के मुख्यधारा म लहुटत हें। ये उदीम नइ केवल बस्तर म शांति अऊ रोजगार के नवा दिशा देवत हे, बल्कि क्षेत्र के पर्यटन ल घलोक नवा पहिचान देवात हे। ये कहानी बस्तर के ओ बदलाव के हे जेमां बंदूक के जगा अब मुस्कान अऊ सत्कार के संस्कृति जनम लेवत हे।