अवैध खनिज परिवहन म सूरजपुर जिला म बड़का कारवाही

सूरजपुर, जिला म अवैध खनिज परिवहन के विरुद्ध प्रशासन ह सख्त रुख अपनात सोमवार के भैयाथान क्षेत्र म बड़का कार्रवाई करे हे। कलेक्टर श्री एस. जयवर्धन के हुकुम के मुताबिक खनिज, राजस्व अउ पुलिस विभाग के संयुक्त टीम ह समौली, कुसुसी, करौटी अउर बसदेई गांव मन म दबिश देके 13 मामला म प्रकरण दर्ज करे हे। एमां 07 रेत, 05 ईंट निर्माण अऊ 01 गिट्टी परिवहन के अवैध मामला सामिल हे।
कार्रवाई के समय जब्त वाहन मन ल पुलिस थाना झिलमिली अउ चौकी बसदेई म सुरक्षा के दृष्टि ले रखे गए हे। संबंधित वाहन मालिक मन के विरुद्ध खनिज नियम मन के तहत कार्रवाई करे जात हे। प्रशासन ले मिले जानकारी के मुताबिक, अपरेल अऊ मई 2025 के समय जिला म अब तक कुल 45 प्रकरण दर्ज करे गए हे, जेन खनिज गतिविधि मन म जिला प्रशासन के सतत निगरानी के प्रमाण हे। जिला प्रशासन के कहना हे कि ए प्रकार के कार्रवाई सरलग होत रइही।
कलेक्टर श्री जयवर्धन ह हुकुम देहे हे के अवैध खनन अऊ परिवहन ल रोके बर जिला स्तरीय टास्क फोर्स पूरा सक्रियता के संग काम करय। उमन कहिन के खनिज राजस्व के क्षति रोकना शासन के प्राथमिकता मन म सामिल हे अऊ ए दिशा म कोनो प्रकार के लापरवाही बर्दाश्त नइ करे जाए। उमन ये घलोक कहिन के स्वीकृत खदान मन के संचालन पर्यावरणीय स्वीकृति के निरधारित शर्त के मुताबिक विधिसम्मत ढंग ले होवय अउ खनिज राजस्व के समय म वसूली ठउका करे जाय। खनन अऊ परिवहन केवल स्वीकृत खदान मन ले ही होवय अउ अवैध स्त्रोत ले होवइया आपूर्ति म कठोर कार्रवाई करे जाय।