सूरजपुर : सरदार वल्लभ भाई पटेल के जयंती म जिला स्तरीय एकता दौड़ के होइस आयोजन

सूरजपुर, लौह पुरुष सरदार वल्लभ भाई पटेल के जयंती ल राष्ट्रीय एकता दिवस के रूप म मनाए बर आज भिनसरहा जिला स्तरीय एकता दौड़ के आयोजन करे गीस। जिला प्रशासन अऊ खेल एवम युवा कल्याण विभाग कोति ले जुन्ना बस स्टैंड ले कलेक्ट्रेट कार्यालय परिसर तक आयोजित एकता दौड़ म जनप्रतिनिधि, जिला प्रशासन, पुलिस प्रशासन, शिक्षा विभाग के अधिकारी-कर्मचारी मन संग सबो शासकीय एवम अशासकीय हाईस्कूल, हायर सेकेंडरी शाला के छात्र-छात्रा अऊ गणमान्य नागरिक मन ह एमा भाग लीन।
एकता दौड़ के शुभारंभ संसदीय सचिव श्री पारसनाथ राजवाड़े अऊ जिला कलेक्टर सुश्री इफ्फत आरा संग आन पदाधिकारी मन हरियर झंडी देखा के करिन। दौड़ के समापन संयुक्त कार्यालय सूरजपुर म होय जिहां सबले पहिली मुख्य अतिथि कोति ले सरदार वल्लभ भाई पटेल जी के प्रतिमा उपर फुल के हार अऊ अगरबत्ती जलाके उमन ल नमन करे गीस। दौड़ म सामिल सबो भाग लेवईया मन ल मुख्य अतिथि ह राष्ट्रीय एकता, अखंडता अऊ सुरक्षा बनाए रखे के किरिया खवाईन। जिला स्तरीय राष्ट्रीय एकता दिवस कार्यक्रम म संसदीय सचिव श्री पारसनाथ राजवाड़े, कलेक्टर सुश्री इफ्फत आरा, पुलिस अधीक्षक श्री रामकृष्ण साहू, जिला पंचायत सीईओ सुश्री लीना कोसम, जिला पंचायत अध्यक्ष प्रतिनिधि श्री शिवभजन मरावी, श्री बिहारी कुलदीप जिला पंचायत सभापति, श्री रामकृष्ण ओझा कांग्रेस कमेटी जिला उपाध्यक्ष, श्री जगलाल सिंह जनपद पंचायत अध्यक्ष सूरजपुर, श्री पंकज तिवारी वरिष्ठ कांग्रेस नेता, श्री नरेंद्र पैकरा संयुक्त कलेक्टर, श्री रवि सिंह एसडीएम सूरजपुर, श्री अजय कुमार कामटे मुख्य अभियंता छ.ग. ग्रामीण सड़क विकास, श्री महादेव लहरे मुख्य अभियंता पीडब्ल्यूडी, श्री शबाब हुसैन प्रभारी खेल अधिकारी संग आन अधिकारी व जनप्रतिनिधि उपस्थित रहिन।