रायपुर, 30 जनवरी 2020। कांकेर जिला के विकासखंड दुर्गूकोंदल म स्थापित गौठान मन म छत्तीसगढ़ सरकार के महत्वाकांक्षी योजना नरवा, गरवा, घुरवा अऊ बाड़ी के तहत पैरादान के काम उछाह म करे जात हे। जनपद पंचायत के मुख्य कार्यपालन अधिकारी के.एल. फाफा के बताती विकासखण्ड म बने 19 गौठान मन म मवेसी मन बर पैरा सकेले जात हे, गांव वाले मन ह महिला स्व-सहायता समूह के महिला मन के प्रेरणा ले पैरा दान करे बढ़-चढ़कर के भसाग लेवत हें। पैरादान ले गांव म बने गौठान मन म पैरा सकेले जात हे।
उमन बताइन कि ग्राम पंचायत हानपतरी के आश्रित ग्राम हिंगनपुरी के गौठान म अब तक 25 ट्राली पैरा गांव वाले मन अउ महिला स्व-सहायता समूह कोति ले सकेले गए हे। गांव के सत्यम स्व-सहायता समूह, शिवम स्व-सहायता समूह अउ बजरंग स्व-सहायता समूह के महिला मन रमुला बाई गावड़े, कुमारी सलाम, गोदावरी पटेल के सियानी म म समूह के सदस्य मन के माध्यम ले पैरा सकेलवात हें। गौठान समिति के अध्यक्ष शिवलाल धु्रवा, कोषाध्यक्ष विजय पटेल, लता पटेल, हीरो सलाम, सीताबाई गोटा, समरोबाई धु्रव, चैतीबाई धु्रव, प्रभातीन पटेल कोति ले मनखे मन ल गौठान म पैरादान बर प्रेरित करे जात हे, संगेच गौठान के प्रति मनखे मन ल जागरूक घलोक करे जात हे। ग्राम पंचायत कोड़ेकुर्से, हाटकोंदल, कर्रामाड़, तरहुल, पेड़ावारी, लोहत्तर, मंगहुर, मेड़ो, चाहचाड़, हानपतरी, आमाकड़ा, राऊरवाही, तराईघोटिया, पाऊरखेड़ा, कोदापाखा, भंडारडिगी, डांगरा, कोंडे, सिवनी, गोयदा के गौठान मन म पशु मन के देखभाल बर पैरा के व्यवस्था दान के रूप म सकेले जात हे। मुख्य कार्यपालन अधिकारी कोति ले ये संबंध म मनखे मन ल प्रेरित करत हें अऊ पैरा ल गौठान बर दान करे के अपील घलोक करे जात हे। ये काम म ग्राम पंचायत के सरपंच सचिव, स्वसहायता समूह के सदस्य अउ आन गांव वाले मन कोति ले प्रेरित करे जात हे। जऊन ल राज्य सरकार के महत्वाकांक्षी योजना नरवा, गरवा, घुरवा, बाड़ी के तहत अपन जुन्ना परंपरा ल स्थापित करे सरकार के लक्ष्य ल पूरा करे म ग्रामीणजन जनप्रतिनिधि अउ अधिकारी-कर्मचारी उत्साहपूर्वक काम करत हे, जेखर से गौठान मन म पशु मन ल आसानी ले साल भर चारा उपलब्ध हो सकही।