रइपुर, 18 अगस्त 2021 बुधवार। ये पइत रक्षाबंधन म महिला स्व सहायता समूह मन के लगाए राखी के स्टॉल म छत्तीसगढ़िया झलक दीखत हावय। समूह के दीदी मन द्वारा बनाए राखी मन म बांस, धान अउ चावल ले बने राखी मन आकर्षण के केंद्र बने हवय अउ बहिनी मन के पहिली पसंद बनके हाथो हाथ बेचावत हे।
राष्ट्रीय ग्रामीण आजीविका मिशन अउ राज्य ग्रामीण आजीविका मिशन बिहान योजना के माध्यम ले स्व सहायता समूह के माइलोगन मन स्वावलंबन के दिशा म आगू बढ़त बेलासपुर म जिला पंचायत भवन के माई दुवार म बूढ़ी माई स्व सहायता समूह धौरामुड़ा अउ जय माँ संतोषी समूह पेण्ड्रीडीह के दीदी मन ह राखी के स्टॉल लगाए हवय। स्टॉल म 10 रूपिया ले लेके 60 रुपिया तक के राखी हवयं। समूह के दीदी मंजूषा गढेवाल बताइन कि स्टॉल धान, चावल अउ बांस ले बने राखी मन ल अबड़े पसंद करत हावय, स्टॉल के पहिलीच दिन 18 सौ रुपिया के राखी बेचागे।
जानबा होवय कि जिला म राष्ट्रीय ग्रामीण आजीविका मिशन अउ राज्य ग्रामीण आजीविका मिशन बिहान योजना के अंतर्गत जिला पंचायत कोति ले ग्रामीण माइलोगिन मन ल समूह ले जोड़के उन मन प्रोत्साहन राशि देके उन्कर पसंदीदा बेवसाय बर प्रशिक्षण अउ बैंक ले ऋण तको उपलब्ध कराए जावत हे, ताकि माइलोगन मन आत्मनिर्भर अउ आर्थिक रूप ले पोठ हो सकैं।
महिला स्व सहायता समूह के बनाए राखी मन म छत्तीसगढ़ के झलक’ : एके दिन म बेचागे धान, चावल अउ बांस ले बने 18 सौ रुपिया के राखी
