प्रधानमंत्री के अध्यक्षता म नई दिल्ली म आयोजित करे गीस कार्यक्रम
रायपुर, नई दिल्ली म आयोजित कार्यक्रम म प्रधानमंत्री श्री नरेन्द्र मोदी कोति ले मिशन अमृत 2.0 अऊ स्वच्छ भारत मिशन 2.0 के शुभारंभ करे गीस। ये कार्यक्रम म सबो प्रदेश के शहरी अऊ आवासन मंत्रालय के मंत्री, नगरीय प्रशासन के सचिव अऊ उच्चाधिकारी मन घलोक सामिल होइन। कार्यक्रम म देश के जम्मो नगरीय निकाय, प्रदेश अऊ भारत सरकार के मध्य पोर्टल के माध्यम ले अमृत मिशन 2.0 अऊ स्वच्छ भारत मिशन 2.0 के क्रियान्वयन डिजिटल रूप ले करे अऊ मिशन के प्रति प्रतिबद्धता दर्शाए बर एमओयू डिजिटल हस्ताक्षरित करे गीस।
ए बेरा म, शहरी कार्य मंत्रालय के सचिव ह छत्तीसगढ़ के प्रदेश म संचालित स्वच्छ भारत मिशन अऊ अमृत मिशन के क्रियान्वयन के मॉडल ल सहराइन। प्रदेश म अंबिकापुर पाछू तीन सर्वेक्षण म उंचहा स्थान हासिल करे म सफल रहे हे, उहें प्रदेश स्वच्छ सर्वेक्षण 2020 म पहिली स्थान म रहे हे। मिशन अमृत के क्रियान्वयन म घलोक प्रदेश ह अव्वल स्थान प्राप्त करे हे।
नई दिल्ली म आयोजित ये कार्यक्रम म स्वच्छ भारत मिशन अऊ मिशन अमृत म छत्तीसगढ़ प्रदेश के अनुभव साझा करे बर नगरीय प्रशासन अऊ विकास विभाग के सचिव श्रीमती अलरमेल मंगई डी. ह प्रस्तुतीकरण के माध्यम ले छत्तीसगढ़ प्रदेश म होत कई ठन नवाचार म ले सबले महत्वपूर्ण भूमिका निभाने वाला स्वच्छता दीदी मन के योगदान अऊ अंबिकापुर के संगे संग प्रदेश के जम्मो नगरीय निकाय म उंकर मन के करे जात काम मन के वरनन संक्षेप म दीन। कार्यक्रम म छत्तीसगढ़ राज्य म संचालित गोधन न्याय योजना अऊ स्वच्छ भारत मिशन के कन्वर्जेंस मॉडल अऊ जीरो लैंडफिल शहर मन बर छत्तीसगढ़ कोति ले करे जात प्रयास, वेस्ट मैजेमेंट के माध्यम ले ग्रीन -जॉब आदि के चर्चा रहिस।
कार्यक्रम म नगरीय प्रशासन अऊ विकास विभाग के मंत्री डॉ शिवकुमार डहरिया , महापौर रायपुर नगर निगम श्री एजाज ढेबर, महापौर नगर निगम बिलासपुर श्री रामशरण यादव, महापौर नगर निगम अंबिकापुर श्री अजय तिर्की, पाटन के अध्यक्ष श्री भूपेंद्र कश्यप, मुख्य कार्यपालन अधिकारी राज्य शहरी विकास अभिकरण छत्तीसगढ़ श्री सौमिल रंजन चौबे, आयुक्त नगर पालिक निगम कोरबा श्री कुलदीप शर्मा अऊ आन जनप्रतिनिधि अऊ अधिकारी सामिल होइन।
