-पाटन म स्वामी आत्मानंद जयंती समारोह के अवसर म मुख्यमंत्री श्री भूपेश बघेल ह अपन संबोधन म स्वामी आत्मानंद के करिन पुण्य स्मरण
– 921 करोड़ रूपिया के लागत के काम मन के दीन सौगात
दुर्ग, आज छत्तीसगढ़ म शिक्षा, स्वास्थ्य, कृषि अऊ आजीविकामूलक गतिविधि मन म जऊन काम होवत हे ओखर रद्दा स्वामी आत्मानंद, डॉ खूबचंद बघेल जइसे विभूति मन ह देखाए हें। ये बात मुख्यमंत्री श्री भूपेश बघेल ह दुर्ग जिला के पाटन म आयोजित स्वामी आत्मानंद जयंती समारोह म कहीन। मुख्यमंत्री ह ये बेरा म 921 करोड़ रूपिया के विकास काम मन के लोकार्पण अऊ भूमिपूजन पाटन विधानसभा म करिन। मुख्यमंत्री ह करीबन 280 करोड़ रूपिया के काम मन के भूमिपूजन अऊ करीबन 641 करोड़ रूपिया के काम मन के लोकार्पण करिन। मुख्यमंत्री ह कहिन कि स्वामी आत्मानंद जी ह अपन पूरा जीवन शिक्षा ल गुणवत्त्ता के संग सबो वर्ग मन बर उपलब्ध कराए बर लगाइन। ऊंखर सपना मन ल मूर्त रूप देहे बर हमन 701 अंगरेजी स्कूल ऊंखर नाम ले सुरू करे हन। इहां अंगरेजी के संग संस्कृत अऊ छत्तीसगढ़ी के सीख घलोक देहे जात हे ताकि लइका अपन परंपरा अऊ जड़ ले घलोक जुड़े रह सकय। उमन कहिन कि मनखे मन बर आर्थिक अवसर उपलब्ध कराए के संग संस्कृति ल सहेजे के दिशा म हमन काम करे हन।
