जगदलपुर, 04 जून 2020। जीवन यापन बर युवा मन ल रोजगार अउ स्वरोजगार के अवसर राज्य शासन के कई ठन योजना मन के माध्यम ले उपलब्ध कराए जात हे। युवा अपन हुनर के माध्यम ले रोजगार प्राप्त करत हें या स्वरोजगार के कोति आगू बढ़त हें। एकर एक उदाहरण जगदलपुर शहर के युवा स्वप्निल खेंडुलकर हे जउन ह स्वरोजगार के माध्यम ले एक फ्लेक्स प्रिटिंग व्यवसाय ल चालू करिस। स्नातक उपाधि धारी स्वप्निल ह व्यवसाय चालू करे बर जिला व्यापार अउ उद्योग केन्द्र ले संचालित ’’प्रधानमंत्री रोजगार सृजन कार्यक्रम योजना’’ अंतर्गत लाभ लेहे हे।
स्वप्निल के पैतृत व्यवसाय फोटो स्टुडियो के रहिस। ऑफसेट प्रिटिंग अउ फ्लेक्स प्रिटिंग के अभी हाल म मांग के आधार म वो ह एखर इकाई स्थापित करे के सोंचिस। इकाई स्थापना म वित्त के समस्या रहिस इही बीच ओ ल शिक्षित बेरोजगार युवा मन बर संचालित प्रधानमंत्री रोजगार सृजन कार्यक्रम योजना के जानकारी अपन संगी ले मिलीस।
स्वप्निल ह जिला व्यापार अउ उद्योग केन्द्र जगदलपुर ले संपर्क करिस अउ योजना के पूरा जानकारी लेके योजना साल 2017-18 म आवेदन प्रस्तुत करिस। कार्यालय कोति ले पूरा सहयोग देहे गीस अउ प्रकरण भारतीय स्टेट बैंक ठाकुर रोड़ जगदलपुर भेजे गीस। बैंक ह संतुष्ट होके फ्लेक्स प्रिटिंग बर 10 लाख 60 हजार के ऋण प्रदान करिस अऊ उद्योग विभाग कोति ले 1 लाख 60 हजार 305 राशि के अनुदान घलोक प्राप्त होइस।
स्वप्निल कम्प्यूटर साईस म स्नातक होए के सेती कम्प्यूटर डिजाईनिंग अउ आन काम खुद करत हे। साल 2018-2019 के बीच 5 चुनाव म अऊ होडिंग, विज्ञापन के काम के संगें-संग अपन अच्छा व्यवहार अऊ गुणवत्तापूर्ण काम के सेती वोकर व्यवसाय सफल रहिस। इही बीच वो ह ऑफसेट प्रिटिंग मसीन के घलोक स्थापना करिस जेखर से एक छत के नीचे प्रिटिंग के सबो सुविधा उपलब्ध हो गीस। वो ह व्यवसाय म सहयोगी के रूप म 07 मनखे ल रोजगार तको देहे हे अऊ नियमित रूप ले बैंक के किस्त पटावत हे। अभी हाल म एकर टर्नओवर करीबन 18-20 लाख हे। भविष्य म ओ ह सी.एन.सी. कटिंग मसीन जेमां लेटर कटिंग होथे, अऊ स्थापित करे के योजना घलोक बनावत हे। श्री स्वप्निल अपन स्वरोजगार ले संतुष्ट हे अउ आन युवा मन ल कहत हे के शासकीय योजना मन के लाभ लेके खुद बर रोजगार के अवसर तियार करव।