स्वर्ण शारदा स्कॉलरशिप 2026: मुख्यमंत्री श्री विष्णु देव साय ह प्रदेश के टॉपर नोनी मन ला करिन सम्मानित

रायपुर, मुख्यमंत्री श्री विष्णु देव साय ह रायपुर म आयोजित आईबीसी24 ‘स्वर्ण शारदा स्कॉलरशिप 2026’ कार्यक्रम म सामिल होके सबो संभाग के टॉपर नोनी मन ला सम्मानित करिन अउ स्कॉलरशिप प्रदान करिन। कार्यक्रम म बारहवीं परीक्षा म पूरा प्रदेश म पहिली स्थान हासिल करइया बेमेतरा के ओमनी वर्मा ला एक लाख रुपिया के चेक अउ सम्मान पत्र देहे गीस। संग म ऊंखर स्कूल स्वामी आत्मानंद उत्कृष्ट हिंदी माध्यम कन्या विद्यालय, बेमेतरा ला घलो एक लाख रुपिया के पुरस्कार राशि प्रदान करे गीस। ए मौका म मुख्यमंत्री ह बालिका शिक्षा ऊपर आधारित पुस्तक ‘मेधा’ के विमोचन घलो करिन।
समारोह ला संबोधित करत मुख्यमंत्री ह कहिन के शिक्षा ह विकास के मूलमंत्र हे अउ सरकार गुणवत्तापूर्ण शिक्षा, नवा तकनीक अउ रोजगार के नवा मउका देहे खातिर संकल्पित हे। उमन बताइन के प्रतियोगी परीक्षा मन के तैयारी खातिर प्रदेश म 34 जगा म ‘नालंदा परिसर’ तइयार करे जात हे। दिल्ली स्थित ट्राइबल यूथ हॉस्टल म रहिके तैयारी करइया 13 विद्यार्थी मन ह ए बछर यूपीएससी प्रारंभिक परीक्षा पास करे हवंय। भविष्य के तकनीक ला बढ़ावा देहे खातिर 500 करोड़ रुपिया के बजट ले ‘छत्तीसगढ़ एआई मिशन’ घलो सुरू करे जात हे।
मुख्यमंत्री ह कहिन के बस्तर म शांति अउ विकास के नवा दौर सुरू हो चुके हे, जगरगुंडा अउ ओरछा जइसे इलाका म एजुकेशन सिटी बनाए जात हे। बस्तर के धुड़मारास गांव ला दुनिया के बेहतरीन पर्यटन गांव मन म जगा मिले हे। नई औद्योगिक नीति 2024-30 के तहत अब तक 8 लाख करोड़ रुपिया के एमओयू हो चुके हे। स्थानीय लइका मन ला रोजगार देहे खातिर बीस्पोक नीति के तहत इंसेंटिव के व्यवस्था हे अउ बरसात के बाद रोजगार मेला के आयोजन घलो करे जाही।
ए कार्यक्रम म स्कूल शिक्षा मंत्री श्री गजेंद्र यादव, सांसद श्रीमती रूपकुमारी चौधरी, राज्य गौ सेवा आयोग के उपाध्यक्ष श्री राजीव लोचन जी महाराज, गोयल ग्रुप के चेयरमैन श्री सुरेश गोयल संग अउ गणमान्य लोगन सामिल रहिन।