रायपुर, जिला व्यापार अउ उद्योग केन्द्र रायपुर कोति ले प्रधानमंत्री रोजगार सृजन कार्यक्रम अउ मुख्यमंत्री युवा स्वरोजगार योजनांतर्गत प्राप्त प्रकरण मन के निराकरण बर टीएफसी के बैठक अवइया एक जुलाई के दिन बिहनिया 11 बजे जिला व्यापार अउ उद्योग केन्द्र, तीसर मंजिल, उद्योग भवन तेलीबांधा रायपुर म आयोजित करे गए हे। मुख्यमंत्री युवा स्वरोजगार योजनांन्तर्गत जऊन आवेदक मन के ऋण बर आवेदन कार्यालय म जमा करे हें उमन ल अपन जम्मो कागद के संग बिहनिया 11 बजे तक उपस्थित होए ल कहे गए हे।
जिला व्यापार अउ उद्योग केन्द्र रायपुर के मुख्य महाप्रबंधक ह बताइस कि मुख्यमंत्री युवा स्वरोजगार योजना के अंतर्गत विनिर्माण उद्यम बर सबले जादा परियोजना लागत 25 लाख रूपिया अउ सेवा उद्योग बर परियोजना लागत 10 लाख रूपिया अउ व्यवसाय बर 2 लाख रूपिया तक के ऋण प्रकरण आवेदन कार्यालय म जमा करे जा सकत हे। संगेच प्रधानमंत्री रोजगार सृजन कार्यक्रम अंतर्गत ऑनलाईन आवेदन www.kviconline.gov.in/www.kvic.org.in के pmegp e-portal म जाके कर सकत हें। ए योजना के तहत विनिर्माण उद्यम बर परियोजना लागत 25 लाख रूपिया अउ सेवा उद्योग बर परियोजना लागत 10 लाख रूपिया तक के ऋण स्वीकृत करे जाही।
जिला व्यापार अउर उद्योग केन्द्र रायपुर के मुख्य महाप्रबंधक ह बेरोजगार युवा मन ले कहिन कि खुद के सेवा व्यवसाय अउ उद्योग स्थापित करके ए योजना के जादा ले जादा लाभ उठावयं। ए योजना मन के लाभ लेहे बर इच्छुक युवा अवइया 30 जून तक आवेदन कर सकत हें। उमन बताइस कि ए योजना म आबंटित लक्ष्य म ले 50 प्रतिशत लक्ष्य अनुसूचित जाति अउ अनुसूचित जनजाति वर्ग के आवेदक मन बर आरक्षित हे ए वर्ग के हितग्राही विशेष रूप ले ए योजना मन के लाभ उठा सकत हें।