स्वास्थ्य मंत्री श्री टी.एस. सिंहदेव ह पत्रकार मन ल तको कोरोना टीकाकरण म संघेरे बर केंद्रीय स्वास्थ्य मंत्री ल लिखीन पाती

रइपुर. 2 अप्रैल 2021 शुकवार। स्वास्थ्य मंत्री श्री टी.एस. सिंहदेव ह पत्रकार मन ल तको कोरोना टीकाकरण म संघेरे बर केंद्रीय स्वास्थ्य मंत्री डॉ. हर्ष वर्धन ल पाती लिखीन हवय। श्री सिंहदेव ह केन्द्रीय स्वास्थ्य मंत्री ल आज लिखे पाती म कहीन हे कि अभीन देश म कोविड-19 के दूसरइया लहर म अबड़ संख्या म लोगन संक्रमित होवत हावय। पत्रकार कोरोना की रोकथाम अउ बचाव, टीकाकरण इत्यादि ले जुडे पल-पल के जानकारी प्रचारित-प्रसारित करके जनता अउ सरकार के बीच कड़ी के काम करत हावय। अइसन परिस्थिति म पत्रकार अउ उन्कर परिवार के सुरक्षा के दायित्व बढ़ जाथे।
स्वास्थ्य मंत्री श्री सिंहदेव ह पत्रकार मन ल फ्रंटलाइन कोरोना वारियर्स के श्रेणी म रखत उन्कर प्राथमिकता ले टीकाकरण कराए के अनुरोध केंद्रीय स्वास्थ्य मंत्री ले करे हावय। कोरोना ले बचाव के टीका लगे म मैदानी स्तर पर जोखिम उठाके काम करइया पत्रकार मन के हौसला बाढ़ही अउ हम सबो मिलके कोविड-19 ले ये जंग म निश्चित सफल होबोन।