छत्तीसगढ़ म अंतर्र्राष्ट्रीय स्तर के स्वास्थ्य सुविधा विकसित करे बर राज्य सरकार तियार

रइपुर, 23 जून 2021 बुधवार। गांव ले लेके राजधानी रइपुर तक छत्तीसगढ़ के स्वास्थ्य अधोसंरचना ल पोठ करे म जुरे प्रदेश सरकार निजी क्षेत्र के क्षमता के तको जादा ले जादा उपयोग करना चाहत हे, इही लरी म मुख्यमंत्री दाउ भूपेश बघेल नवा रइपुर म 25 एकड़ भूमि आरक्षित करे के निर्देश देहे हे। जेमा अंतरराष्ट्रीय सुविधा वाले कोनो नामी अस्पताल के स्थापना करे जा सकय, जिहां राज्य के योजना के तहत इलाज करे जाही। एकर ले प्रदेश के संगे —संग परोसी राज्य मन ल तको एकर लाभ मिलही ।
भविष्य म कोनो मरीज ल प्रदेश ले बाहिर जाए बर झन परय, एकर बर विकासखंड ले लेके जिला स्तर तक सबो शासकीय अस्पताल मन ल पहिलीच ले सर्वसुविधायुक्त बनाना हे।
मुख्यमंत्री ह मुख्य सचिव ले कहीन हे कि ये अस्पताल म विशेषकर मल्टी ऑर्गन ट्रॉन्सप्लांट के सुविधा के संग अबड़ किसम के मल्टी सुपर स्पेश्यिलिटी सुविधा के बेवस्था के प्रावधान होवय । ये अस्पताल एक हजार ले डेढ़ हजार बिस्तर ​के होवय अउ ओमा 50 प्रतिशत मरीज मन के इलाज डॉ. खूबचंद बघेल योजना, नइते आयुष्मान भारत योजना के तहत करे जाय के अनिवार्यता होना चाही।