स्वतंत्रता आंदोलन म महत्ती भूमिका निभइया पंडित सुन्दरलाल शर्मा संग आन आंदोलनकारी मन के परिजन मन ल कंडेल आमसभा म शाल अउ श्रीफल देके करिन सम्मानित
रायपुर, राष्ट्रपिता महात्मा गांधी के 150 वां जयंती के उपलक्ष्य म 04 अकटूबर ले प्रदेश के मुखिया श्री भूपेश बघेल के कुशल नेतृत्व म कंडेल नहर सत्याग्रह के स्मृति म कंडेल ले ‘गांधी विचार पदयात्रा‘ शुरू करे गीस। ए मौका म कंडेल म आयोजित आमसभा म स्वतंत्रता संग्राम सेनानी मन ल याद करत ऊंखर परिजन मन ल शाल अउ श्रीफल देके मुख्यमंत्री ह सम्मानित घलोक करिन। एमां स्वतंत्रता आंदोलन म महत्वपूर्ण भूमिका निभदया पंडित सुन्दर लाल शर्मा के परपोता श्री आशीष चंद्र शर्मा घलोक सामिल हे।
हम आप ल बता देवन कि राजिम के तीर ग्राम चंदसूर म जन्में पंडित सुन्दरलाल शर्मा 1905 म बंगाल विभाजन के बाद जऊन स्वदेशी आंदोलन चलिस, पंडित सुन्दरलाल शर्मा ह उही बेरा म रायपुर म 1906 म खादी केन्द्र के स्थापना करिन। कंडेल म 1920 म होए कंडेल नहर सत्याग्रह म बाबू छोटेलाल श्रीवास्तव के संग पंडित सुन्दरलाल शर्मा के घलोक महत्वपूर्ण योगदान रहिस। उमन एखर संगेच हरिजनोद्धार के महत्वपूर्ण काम करिन। जेकर महात्मा गांधी ह 1933 म छत्तीसगढ़ म अपन दूसर प्रवास के समय मुक्तकंठ ले प्रशंसा करत ओ मन ल अपन सामाजिक गुरू मानिन। इंकर असहयोग आंदोलन म घलोक महत्वपूर्ण योगदान रहिस। उमन छत्तीसगढ़ म सामाजिक चेतना के स्वर घर-घर पहुंचाए के अविस्मरणीय काम करे गीस। ओ मन न केवल आंदोलनकारी रहिन वरन् ओ मन साहित्यकार, लेखक, चिंतक घलोक रहिन। उमन छत्तीसगढ़ी रामायण के रचना करके छत्तीसगढ़ के साहित्य म अमूल्य योगदान दीन।
क्रमांक-2866
