कोरबा के पसान के हलवई के घर म लाखों रूपिया अऊ जेवर चोरी

कोरबा, ०५ मई २०२४। कोरबा के पसान क्षेत्र म हलवई के घर चोरी के घटना होए हे। चोर मन मिठाई व्यवसायी मने हलवई गौरव गुप्ता के घर म सेंधमार के भितरी घुसरिन अउ कुरिया म  रखे अलमारी ल हेर के अपन संग अड़बड़ दूरिहा ले गें, जिहां ओला तोड़के साढ़े तीन लाख रुपिया नगद अऊ सोना-चांदी के जेवर के चोरी कर लीन। सूचना मिले के बाद मौका म पहुंचे पसान थाना पुलिस ह जांच शुरू कर देहे हे। हलवई गौरव गुप्ता ह बताइस के मंगल के रात उमन खाना खाए के बाद पति-पत्नी लइका समेत दूसर कुरिया म सबो सोए चले दीन। जेन कुरिया म चोरी होए हे वो कुरिया ल बाहिर ले बंद कर दीन। भिनसरहा उठे म ओ मन ल चोरी के जानकारी होइस। व्यवसायी अपन बहिनी के बिहाव खातिर नगदी अउ सोना-चांदी के जेवरात बिसा के रखे रहिस।